Ecuador

Im Bus mit Starbucks Muffin - guet fuer dLuune und dHandles

Nachere 19h Busfahrt dür Peru simer in Mancora gstrandet und hei dert üsi Adonis-Körper dr Sunne usgsetzt! Nach 2h simer properly grilled xi u mer wäre i jedem Meerfruchtrestaurant as Lobster düregange...

Drum heimer is de am Strand abgwändet u si uf Ecuador! Dört simer dür kilometerwiis Bananeplantage gfreeset und ime erst Kaff glandet! Nachere Übernachtig mitere Psychoklima-Alag (di het au 1sec knackt) simer när wieder id Höchi nach Cuenca womer uf 3900m eh lengere Spaziergang dürne Nationalpark gmacht hei!

Im  Wald - und ja, es git naechst Mau Ansch Fotos

Es het üs natürlech ungloublech verschifft u mer si öppe je drü Mau umgheit vor luuter schlippfrigem Bode! Drum simer iz wieder uf 0m, womer di nächste 10 Täg bliibe!

In Guayaquil acho heimer is uf dSuechi nacheme Galapagos-Schnäppchen gmacht! Und siehe da, mir si fündig worde! Am Mändig flüge mer los und mache eh 3Nacht/4Tag Tour und gö när no 5 Täg uf eigeti Fuust los! 

Mir hoffe mir chöi de dr eint oder anger Blaufuess-Tölpel, Riese-Schiudchrot oder SeeLöii wuusche!

Mir mäudenis bi Glägäheit!

Cheers

ps. Da dir ues aui vermisset - es isch iz scho Halbziit. Glii heiter ues wieder am Hals.

pps. Ja, mir waerde naechst Mau Fotis vor Ansch ufelade und nid immer nume am Uersu sis wueeschte Xicht zeige

ppps. geschter simer sit 3 Moenet wieder Mau imne Pizza Hut xi und hei festgstellt das me in Ecuador zur Vorspiis Cinamon Sticks nimmt und naer zur Houptspiis Pizza! WUEST!

Peru un Au Revoir

Geschaetzte Leser

Üse zwöit Gast het üs wieder verloh und mir sägä Au Revoir (wiu är nämlech i 8 Wuche wieder zu üs wird stosse)! Di rästleche 8 Wuche wärdä mer no Ecuador u Kolumbie widme!

Dr Chrigu het, entgägä sine Vorliebe, dWermi vor Heimat verloh und sech de rauhe Geziite vom bolivianische und peruanische Altiplano gstellt! 3600, 4100, 3800, 3400 und 2400 Meter si sini Destinatione xi! D'Höhi und dCheuti hei bi aune ihre Tribut gforderet! Nach eitägiger, resp. Einächtiger Schwächephase mit erhöhter Temperatur isch dr Chrigu uferstange! D'Ansch het ne mit bällendem Hueste abglöst und schlussändlech het sech no eh Wurm i Ürsus gschwächte Mage verirrt!

El Tucan ufem Machu Picchu

Ufe Machu Picchu heimers aber gschafft u sogar El Tucan mitbracht! Für Nid-Insider: üse Begleiter sitem Mac in Buenos Aires mitem Nicu!

Unbestätigte Quelle zufolge isch dr Chrigu iz wieder deheime, aber weder Fründ no Fiind wird ne äuä bis nächst Wucheänd xeh...

Lindt Schoggi in Peru

Whiskeeeeeeeyyyyy

Mir si iz in Lima, genauer in Miraflores, wos meh usxeht wi in Amerika! Mac, Pizza Hut, KFC, BurgerKing, Starbucks etc. si hie am Start! Mir hei sogar Lindt Schoggi gfunge (für 8.- dPlagge) und unger Adrohig vom Rauswurf fotografiert! Chli Whiskey hets ou gäh und ou dä weimer no zeige (schön Nicu, nid?)!

So, iz gö mer go Noodles choche u när go Pirates of the Carribean uf Änglisch (ja, dä chunt nume uf Dütsch bi öich, hehe) und 3D ga luege!

Cheers

Ansch u Ürsu

Grenze

Di versprochne Biudli us dr Uyuni-Wuesti I

Di versprochne Biudli us dr Uyuni-Wuesti II

Guet! Wi akündet hei mir no eh wiitere Blogg im Louf! Es Abentüür oder wi mir würde sägä: eine Geschichte aus der Gruft!

Usblick us uesem Hostel uf dr Isla del Sol

Mir si vor UyuniWüesti mitem Nachtbus nach LaPaz u vo ded uf Copacabana am Titicacasee! Dr Nachtbus het 4 vo 10h dermasse gschüttlet, dases eim dBlase fasch vonelei glährt het! In Copacabana heimer deno es Schiffli gsattlet und si uf dIsla del Sol! Dert heimer uf ca. 3800m no 250 Stägätritte zum Hostel müesse erklimme! D'Lunge het vor Schmärzä gschroue, ds Härz isch fasch implodiert u vor de Ouge si Stärnä tanzet!

Uf dere Insu heimer de ou ds erst Mau z'gflüglete Wort 'Streik' ghört! Naiverwiis heimer agnoh das das eh dBolivianerhinterwäudler si... Wi sech de usegstöut het ischs aber dr Achso-Fortschrittlechi Nachbar wo gstreikt het... Aui Wägä ume Titicacasee heisi mit Steine u Houz verbarrikadiert! Was bliibt eim da angers übrig as dr Seeweg? Eh Agentuur het de o entsprächend Tickets abote und üs luuthaus druf ufmerksam gmacht! Dr einzig Hacke? Ds Boot isch am Morge am 08:30 gfahre u me het sech no müesse in Bolivie ab- und in Peru amäude... Bim Zoll wo 15min vom Schiff wäg isch u ersch am 8ti uftuet... Was macht der findige Reisende? Richtig! Er geit sech am Abe vorhär go dStämplä hole u isch när eh Nacht illegale Usländer! Das funktioniert in Boliviä, wome gägä ne chlini Gebühr es angers Datum im Pass cha ha! Bi de Peruaner geit das nid und drum simer am Morge früeh agstange u hei no ds zwöite Stämpeli ghout! Zrügg bi de Schiff heimer de knapp es Ticket und eh Platz ufemene überfüllte (Afrika-Flüchtling-mässig) Böötli ergatteret! Mitem Versprächä 4h Boot u 1h Bus würde üs as Ziel - Puno, Peru - bringe! Wi das bi Illegale Gränzübertritt über di grüene (i üsem Fall, blaui) Gränzä isch chunts geng chle angers! Nach 3h ischs no 1.5h gange u när no Mau 2h! O der unufmerksamst Tourist het bald gmerkt: der Bolivianer kennt sein Handwerk NICHT! si hei weder eh Ahnig gha wo si si, no wo si härä müesse... Nach 6h ufem See (mit afänglech agnähme Temperature und später isetzendem Antarktiswind) het me de gmerkt: me het keh Sprit meh! Drum het meh agleit und 2 Büsli bstöut! Wo de o prompt fasch Ziitgliich vor Ort si xi! Ds Problem a 2x 25 Personebusse isch, das dert di 100 Lüüt vom Boot nid aui drin Platz hei... D'Mängi isch begeisteret xi, vor auem wo sech de no eh Gruppe Israelis z'vorderst füredrängt het... Es göng es Ratito (es Ziitli) het me de resignierende Touriste mitteilt! Vo wiitem heimer dStoubwulche vom ne Taxi erahnt und das sofort usurpiert! Di übrige 97 Reisende hei, bevor si gwüsst hei was ne gscheht, nume no üse Stoub chönne schlücke... Für 10.- pro Nase heimer üs verdünnisiert u si ziitig ufs Fürabebier in Puno acho...

Iz simer ufem Wäg Richtig Cusco u Machu Picchu!

Grüess us Peru

Ansch, Chrigu, Ürdu

Uyuni (leider ohni Foeteli - USB funktioniert nid...)

Mir si us dr Uyuniwüeschti zrügg u hei wieder einiges z'brichte...

Afoh möchte mr einisch meh mit ere Busfahrt... Hie wird vor jedere Busfahrt dr Ghörgang vo marktschreierische Wiiber mit schrille Stimme (schlimmer as am Ürsu sini) maltretiert! I x-facher Usfüehrig wird dr Zielort (Uyuni, Uyuni, Uyuni! Oder Potosi, Potosi, Potosi) akündet! Isch me de däm Sirenegsang entrunne stiige di nächste ih, wo eim 'Pan Dulce, Pan Dulce' (wär wott scho Süessbrot? Pfui Teifel) is Ohr bäägge!

Für üsi 2 Tagestour heimer je 150.- (es Vermöge in Bolivie) zahlt und drfür fougendes brcho (Reihefolg vo positiv zu negativ):

1) Wunderschöni Idrück vor Salzwüesti wo gloub rächt einmalig isch
2) Sensationell lustigi Fotomöglechkeite womer öich ni wei vorenthaute (choeme de im naechste Blog)
3) Eh Fahrt dürne Route vou vo Lagune, Vulkän u geile Ussichte
4) Freii, wiudi Flamingos
5) Llamas u Vicuñas
6) Ässä wo sech kontinuierlech gsteigeret het (vo Llama-Anus über Chickenwings zu Milanesas)
7) Eh Fahrer wo dMeinig meh gwächslet het as anger dUngerhose (mir gö hiä, nei do, ah Mou doch dert)
8) Eh Ungerkunft wo ds heisse Wasser 20 B$ koscht het u ds Zimmer drü Bett und 1m^2 freii Flächi gha het
9) Nid VegiÄssä obwou mes im Mail, im Büro und no im Outo xeit het
10) WCs wo pro Furz 5B$ choschte exkl. WC Papier (normalerwiis choscht di Fröid 1B$ und s'git Schmirgupapier fürs Füdli)

Am Fahrer heimers heimzahlt indäm dr Chrigu und Ürsu eh Ufforderig geflissentlich überhört hei... Bim zMittag hets bim verteile gheisse vo de Milanesas (panierti Pouletblätzli) heigs für jede eh Portion! Das 4i het gha u mir 4 Lüüt si -1 Fleischfrässer, heimir guet u richtig grächnet das das je 2 für üs git! Begeisterig vom Fahrer am zMittag het sech i ängä Gränzä ghaute...

Guet, das wäre üser Erläbnis us dr Wüesti...

Adieu

Ansch, Chrigu, Ürsu

Ps. Ryan, üse Fahrer isch xi wi du! Eh Gott am Stüür wener ändlech würd Theorieböge aluege...

Pps. Rebi, da dr Ürsu wäg dir u dire Nochnichtfahrtüchtigkeit mit 30gi eh Long Island vrlore het (dAnsch laht la danke), möcht är amerke, das du hie in Bolivie wine normale Verkehrsteilnähmer wärsch... Hie cha jede chle freestyle fahre...

Ppps. Fuer die ufmerksame Laeser. Es wird naechstens (aso sprich i de naechste 2-3 Taeg wieder eh Blog gaeh...). Vilech nume mit eim Foeteli, aber mir hei eh strapazioesi und abentuerlechi Fahrt hinger ues... vo Copacabana in Bolivie uf Puno in Peru... Aso... glii wieder cho ineluege...

WmdR

Ueses noeiste Reisemitglied: Mr. Lienhard

Dr Chrigu isch mittlerwiile sit drei Taeg do und mer heinem scho paar Sache gfueetteret (wi z.B. eh Liter Vitaminshake zum z'Morge), ne fasch i Tod gchickt (siehe unten) und sini Blase mitere 9h-Fahrt strapaziert.

Im Momaent simer hie in Potosi, dr hoechste Stadt (oder aemu 100'000 Iwohner Stadt) vor Waeut uf 4100m. Huet weimer id Hot Springs wos do ir Noechi het, bevors de id Salzwueesti vo Uyuni geit.

World's Most Dangerous Road

Chrigus Geburi heimer mitemne Velotrip uf der Worlds most dangerous Road (WmdR) gfiiret. Fuer ne Maa wo sit vier Jahr nuemme Velo isch gfahre, het sech ds 30-jaehrige Mandli raecht furchtlos de teilwiis 200-300m tiefe Abgruend gsteut. Usser Muskutkater und Adrenalinueberdosene simer dere Stross aber guet entcho. Zum Schluss simer naer aus womer mitem Velo abegfahre si, mitem Charre ir Nacht wieder ufe! Sehr vertrouenserweckend si o dAmbulanzmitarbeiter xi wo no ir Nacht hei probiert miteme Seili oepper oder oeppis useme Abgrund z'baerge.  Eini vo uesere Gruppe het im Uebrige weniger Glueck gha u sech mit ihrne uebergrosse Stulpe quasi selber es Rad gstellt. Di hets igfaedlet und ihre naer zVelo gottlos um ds Bei ume gliiret. Fertig gveloelet...

Chrigu uf dr Zipline...

Zum Schluss heimer no sone Zipline-Abfahrt gmacht, was ar Ansch am meiste zuexeit het :-) im Vergliich zur Strass si di 200m Hoechi und bis zu 50km/h Gschwindigkeit nuem so beaengstigend xi...

Iz simer, wi xeit in Potosi und fahre morn id Uyuni Wueesti. Naer stoeh no der Titicaca-See u dr Machu Picchu as wiiteri Highlights bevor!

Dir ghoeret vo ues!

Ansch, Chrigu, Uersu

La Paz

Ahoi us La Paz

Mir si vorgeschter ir hoechste (gloube mer aemu...) Houptstadt vor Waeut acho: La Paz uf knapp 3700m. Viu heimer no nid xeh vor Stadt, aber das weimer ab huet z'dritt nochehole.

Vo Sucre us simer mitem Nachtbus nach Cochabamba gfahre. dBusse hie hei zwe Eigeschafte. Si si a) billig (me zahlt fuer 8h maengisch 5 u maengisch o nume 3 Franke) und b) hei si kei Lokus wome cha bruuche. Sprich: me sitzt im Bus inne und hofft, das eim dBlase nid platzt. Wasser isch nid axeit und das ire Hoechi vo 2800-4500m. Me cha aso uselaese oeb me lieber Chopfweh wott oder oeb me lieber wott id Hose bisle. Wi dBolivianer das gnau mache isch ues es Raetsu. Ah jo... es git Stops uf 8h Fahrt: Eine!

Fanta Waerbig ame Huus in Cochabamba

Cochabamba het ues nid so ueberzuegt. Luut Lonely Planet sig das eh Superstadt mit ungloubleche Maerkt, aber mir hei gfunge das dae Markt nid so super isch. Me cha zwar vo Spiuzueg, ueber Fleisch, Laebigi Tier (ca. 30 Hase i eim Chefig vo 20x30cm), troechnete Lama-Foete, Chleider, Chueeche etc. aus choufe, aber irgendiwe machts glich nid so Spass. Henu... iz simer jo do in La Paz und luege wases hie so git.

Nid indisch, sondern bolivianisch - Suppe mit allerhand drin

Geschter simer go indisch aesse... mitem unagnaehme Naebeeffekt das mer iz stinke wi fritierti Samosas, aber z'aesse isch sensationell laecker xi. Uf Anschs Wunsch ds Aesse scharf z'mache hets de eh chli Chili im Aesse gha, was se aber nid sonderlech gstoert het... nach afaengleche Traene het me de tapfer Zaehn zaeme bisse und usgaesse. Me cha jo schliesslech nid der Choch lah gwinne, oder?






guet, me heimer ou gad nid. Mir hoffe dir gniesset der summer wo ir Schwiiz jo offesichtlech iz wuerklech agfange het, oder?

Mir hei im uebrige chaut... aber dasch ja i dere Hoechi nid anders z'erwarte. Wenns schoen isch und nid bewoelkt, de isches super und warm. Sobald dSunne waeg isch oder eh chlini Wulche chunt. Angers chaut... aber guet... mir waerdes ueberstoh :-)

Haebets guet und schoens Wucheaend

Ansch, Chrigu und Uersu

ps. Sorry, si nid wuerklech Fotis wo zu daem Blog passe, aber das si di einzige womer hei choenne ufelade... und da ja immer nach Fotis gschroue wird, mueester nech haut mit dene begnuege ;-)