Dog Blog

¡¡Wuff!!

Dae Blog hie wird sicher mit befremden wahrgno... di einti Heufti vo uesem Gspann (siehe Kommentar vom Fischflueschterer) het sech vor Chatzeflueschterin zur Hundeliebhaberin gwandlet... Richtig... dRed isch vor Ansch! Si moecht aber hie no saege, das si Chatze geng no um einiges kuuler fingt...




 Drum dueemer iz dae Blog am beschte Fruend vom Moensch widme. Am Dog... eh richtige Dog Blog!



Es git eh Million Hueng hie und im Gaegesatz zu Asie ischs eso, das die hie nid so usgmerglet usxeh sondern relativ fit si! Das ligt, lut Lonely Planet dra, das dChilene und dArgentinier s'nid uebers Haerz bringe de Tierli ihri Cojones abzhacke...



Sie duee ihrne Chindali es Huendli schaenke und wenns nuemme so haerzig isch, de dued mes naer ussetze! Das isch fasch so wi bim Sebi... Dae het jo ou es Hundeli woner nuemme het woeuae und iz isches bir Mama... Nid wahr, Sebusch?






 



Guet... mir si ueberzuegt das dir nid eh Biologiestung weit, drum loemer das Mau loh si und aende mit uesem Dog Blog! Ah, natuerlech het dAnsch di Viecher ou so gaern wiu si hie nid so ufdringlech si und eim nid abelle und nid huere nacheseckle... si loeh sech aso relativ eifach lo verstoeike...

WauWau

Ui, da het sech no es Schwoin inegschliche...

San Patricio

Sale, Sale

Nach uesem Abentuer im Hotel Katzenklo heimer is entschiede diraekt uf Santiago de Chile z'chessle. Eh interessanti, aber nid weltbewegendi Stadt womer zFuess erkundet hei... Lut Lonely Planet sig dHouptattraktion vo dere Stadt es Seilbaehnli, dummerwiis funktioniert das sit 2 Jahr nuemme (dr Lonely Planet isch vom Maerz 2010...). Me cha saege, dr Chilefuehrer isch aeuae eine vo dene wo si kopiert hei :-)

Chilenischi Kunscht... Me soeu nid saege mer sige Banause...

Bitte Farbkombination beachte...

Mir hei aber glich luschtigi Sache gfunge, unger angerem eh kuule Maerit und es guets Irish Pub wo mer mit paar Chilene dr St. Patricks Day gfiiret hei (San Patricio heisst dae hie). Am Ryan zEhre heimer is sogar grueen agleit und grueens Bier trunke.

Kopulierende Meeressaeuger

Naer simer suber wiiter Richtig Norde und hei in La Serena Halt gmacht. Dert simer eh Tag umegammlet und naer am naechste Tag ines Reservat womer no einisch Seeloeie (oeppis ganz Noeis, mir duee nech ou nid mit Foeteli belaestige), Pinguine, Seeotter (di Sieche hei sechn id lo foetele) und Delphine xeh hei. dTour isch raecht langwiirig xi und zMittag hets ersch am 1530 gaeh, was ues Fraesseck natuerlech sehr gfroeit het...


Ah, dDelphine si nume so lang dobe blibe, wiu si am vogle si xi... Fuere Unbedarft Laie: Sex bi Delphine geit 7sec. Ds Froueli due 2sec ds (Blas)loch uf und ds Mandli het naer 5sec Ziit driizvogle (stimmt das, Frou Meeresbiologin?)

Valle de Elqui

Iz simer im Valle de Elqui, chli oestlech vo La Serena ime Kaeffli hinger und hei huet eh Pisco Distillerie bsuecht. Mit Pisco (Grappa in Wueescht) macht me Pisco Sour, Anschi's noeie Lieblingsdrink (het ou no Eiwiis drinne - wueescht)!



Morn goemer wieder Richtig Suede fuerne letschte Stop vor Santiago womer de, richtig mir heis scho hundert Mau erwaehnt, dr Nicu goe go abhole.

Im Uebrige choeme immer meh Nachfrage a la: "Choemeter no us zaeme?", "Heiter nech no nid Gringe igschlage?", "Choeiter nech no schmoecke?". Danke der Nachfrag, mir verstoeh das dir ues aui vermisset (mir vermisse nech ou), aber mir hei weder Krach, no dSchnurre vou und choeme no nid gad hei! Aber me cha ues immer no cho bsueche... s'het no Platz :-)

Herz und Seele, hae? Haetteter nid daenkt... tssssss

Guet... Haebets aui guet und haltet ues ufem Loufende mit (Froue-Manne)-Gschichte... Dir wuesst: Geschichten aus der Gruft si immer willkomme!!!

Adios

Hostels

Nume eh churze Lacher fuer aui...

Mir hei wieder einisch es guets Hostel verwuetscht... z'ersch simer acho und niemer isch do xi und mer hei eh Stung mueesse warte, hei derfuer aber iz es ganzes Hostel fuer ues...

Vou Froeid heimer ou eh chlini Busle ir Nachberschaft gsichtet... was mer nid gwuesst hei isch, das di chlini Busle Zuegang zu uesem Zimmer het... si het sech de ou dert vergnuegt...

Womer gad is Bett hei woeuae, seit Uersu zur Ansch... hie inne stinkts... uf mire Siite nach irgendwie Gschimmletem... bim Blick ad Dechi ufe wird ou klar werum... Wuest Nr. 1: Schimmel ar Dechi. Ansch zu Uersu: Bi mir aene stinkts irgendwie nach Scheisse... bim Blick ungers Bett wird de ou dert klar werum: DBusle het ihres Gschaeft diraekt unger Anschs Bettsiite gmacht. Wuest Nr. 2.

Dir xeht... Reise isch nid immer nume spassig...

Haebets Guetschmoeckend und Unverschisse...

Ansch und uersu

Chile

Hola de Chile

Mir si iz sit vier Taeg nuemme im gelobte Land sondern in Chile. Mit grosser Begeisterig simer am Zoll vo Spuerhuend und Zoellner durchsuecht worde und uese Bus het vor luter Chlupf gad kei Batterie meh gha. So isch usere normale 5h Fahrt eh 9-stuender worde. Eh wahri Froeid.

Vo Puerto Montt, uesere erste Station simer naer uf dInsu Chiloe, wo mer zwe Taeg verbrocht hei. Am 2te simer ine Nationaupark, hei aber dert irgendwie der Trail verpasst (resp. er isch nid existaent xi) und si naer 2h ufere asphaltierte Strass gwatschlet... das het is naer glaengt und mer hei no eh Insurundfahrt gmacht. Derfuer simer miteme schoene Sunneufgang gweckt worde, wo mer oeich nid wei vorenthaute...

Chiloe-Sunneufgang us uesem Zimmer

Im Uebrige isch uf dr Insu Chiloe der 0km Stei vor Panamericana. Dae simer natuerlech ou no go luege... mir naeme Mau ah, dMehrheit het daenkt, dae sigi in Ushuaia... Dem ist aber nicht so... Faus der auso vorheit Mau Panamericana z'mache, wuesster aemu iz wo si ufhoert :-)

Uersu nach z viu Raege



Ufem Waeg i Norde heimer in Valdivia Halt gmacht. Dert hets ues verschiffet, was uf dLuune und ufe Geischt vom einte Reisemitglied gschlage het. Ou das weimer oeich nid vorenthaute:

Gluecklecherwiis heimer no Kollege vo ues atroffe und eh Stopp ire Bierbrauerei choenne mache. Dert heimer Spaetzli mit Suurchrut und Oepfumuess gfoodet und natuerlech no ds Bier probiert. Ufem Rueckwaeg, heimer wi xeit, Kollege atroffe. Es Rudu Seeloeie het der Fischmarkt vor Stadt unsicher gmacht und mir hei es Exemplar vo ganz Noechem choenne abliechte:

Uf Fisch wartende Seeloei

Iz simer in Pucon, eme u huere touristische Kaff wome schiins ungloublech viu choenni mache. Ues duechts nid so und es gfaut is nume bedingt. Drum mache mer morn eh Waggu und goe no id Hotsprings do ir Umgaebig und naer wiiter Richtig Norde.

So... mir hoffe es geit aune Laeser guet und wuensche oeich eh gueti Ziit

Ansch und Uersu

Herzschmerz

Für aui guetussehende, muskulöse Manne u aui grossbrüschtige Schönheite: Nein, dä Blogg geit nid um üsi Trennig!

Für aui Fotoliebhaber: es wärdä o kener Biudli presentierrt!

Nei, es geit hie meh um Patriotismus!

Wi dir wüsst si mir jo in Barriloche! Das sig wi dSchwiiz und entsprächend gits hie ou? Richtig: Fondue!

Mir hei das Hüt beobachtet: näbst däm das hie zum Fondue toastets Wiissbrot serviert wird, gits ou no Schiccorė (dä wo dä Schisssalat erfunde het sött me eh houe) und Tomätli drzue! Um aus ztoppe wird de ou no sRöscho nach 2min abgstöut und me rüehrt när ir sich verdickende Käsesuppe!

S'isch eh Gruus und dued is im Härz weh was da mit däm arme Fondue vrbroche wird! Mir hoffe mer hei kener Auptröim!

Guete Abe, resp. guet Nacht

Mir hei der Blog wieder einisch vernachlaessiget, aber das het natuerlech wi immer sehr gueti Gruend... 

Der erst isch, das mer 3 Taeg i sones Baergkaff si, wos kei Internet und Natel und so oder eso gad gar nued het gha... und was het me dert choenne mache? Richtig... Wandere... uesi Lieblingsbeschaeftigung ir letschti! Das hei mer ou gmacht und mir si am 2te Tag sogar belohnt worde... Naemlech mit der Ussicht ufe Cerro (Gipfel) irgendoeppis... Cerro Torre, waers :-) ... und dae isch ufem Lonely Planet vor druf... das der das ou choeit ueberpruefe, heimer nech dr Link aghaenkt...

Hie ueses Biud:

Ja, si hei is viu fuer das Foeteli bote, aber mer hei nid woeuae...

und hie der Link: http://shop.lonelyplanet.com/argentina/argentina-travel-guide-7

2 ganzi Stung heimer mueesse warte bis aui Wulche waeg si xi... aber das mache Fotografe aebe, gaeu Nad :-) As Dank isch naer zWalross Urs uf sini Kamera ghocket und di het iz eh Spalt drinne... Ah, ueberigens... Waer de uf Patagonie geit und nid mit some Foto heichunt, dae het de angers abglooset, Vaetterchen :-)

Im Uebrige duee si in Chalten schoen dAbfaell trenne, wi sechs ghoert:

Nach Chalten simer per Bus 2 x 12h i Norde ufegfahre... ganz mueehsam xi und am Uersu dued iz aus weh wiu er langsam alt wird :-(

So wi das choeiter nech ueberigens der groescht Teil vo Patagonie vorstoeuae (dasch de kei Witz...) was me uf daem Foeteli nid xeht isch dr Wind... vo daem hets ou ganz viu... wuerklech viu:

So... suesch simer xund und gfraesig... hei huet gad eh Riesetorte und 2 Iiskaffee verdrueckt und hoffe, das mer no nid auzu dick si... s'isch z'chalt zum Badhosefotos abzliechte, aber hie heiter mau no eis wo zeigt wi xund das mir si

Der iifrigi Beobachter wird wuesse, das der Uersu selte bis nie eh Brill ahet... daser hie eini treit ligt dra, daser wieder einisch mit de Schnaebifinger id Ouge isch und s'die naer komischerwiis liecht groetet het...

Guet... mir hoffe es geit oeich aune guet und wuensche nech eh gueti Nacht!

Mir verloeh uebermorn uesi heiligi, argentinischi Chue und goe Mau go luege was in Chile so geit... i drei Wuche lade mer de dr Nicu in Santiago uf und due am El Gordo Mau zeige wime richtig Fleisch isst und Bier trinkt...

Mir hei zu daem us dr Faerni no eh Amerkig... verschiedeni Quelle loeh ues loh zuecho, das me nuemme so i Usgang geit wiu der Peitscher Urs und dBrandstifterin Ansch nuemme da sit... dir heit iz no genau 7 Moenet Ziit und naer geit de wieder es angers Lueftli... naer isch de fertig deheime ghocket...

Amerkig Nr. 2: dr Chrigu wird ja 30gi und dir aui heit sicher kei Idee fuer nes Gschaenk... mir hei eini gha... dir choentet ja zaemelege und ihm es bruuchts Velo choufe... de mueesster nid immer mitem Outo id Stadt fahre sondern choent si Adoniskoerper per Velo sterche!!! mir duee ihm de ou oeppis schaenke... naemlech eh Velofahrt in Bolivia... dRuta de los Muertos...

So... haebets guet

Ansch & Uersu