Cafe

Mir si mittlerwiile in Medellin (Medeschin usgsproche) acho! Fûr aui wo das nid wüsse, dr Stadt vom Pablo Escobar (sini Seel schmort wahrschiinlech ir Hölle)! Getreu däm Vorurteil het üses Hostel ou eh private Drogeverchöifer wo geduldig wine Roubvogu sini Rundine hie vor dran dräiht! Mer hei bim Bier trinke zwe Ichöuf döfe bestuune! Z'Resultat vor Drogezuefuehr heimer ou chönne bewundere... I gränzäloser Säubstüberschetzig het eh nid gad schöni Dame dRundi vo ihrne männleche Verehrer gfragt wi alt si de sig! D'Damewält macht das ja bekanntlech ir Hoffnig ufnes Komplimänt (sogenannts Fishing)! Das isch de ou prompt cho: 26 oder 27gi isch di einhellige Meinung xi (dr Kraterähnleche Landschaft uf ihrem Chopf na z'urteile wär 30gi äuä eher wahr xi)... Di richtigi Antwort wär 23gi xi :-) Erfüllt! Dr zwöiti Konsumänt het z'rede verlehrt u no vo sech gäh das dLieblingsmusik i sire Heimat Kroatie dShakira sigi! Nach Siuveschter mitem Nik u sim schön farbigr Schal wüsse mer iz oundas in Kroatie weder dr Mode-, no dr Musiggschmack guet di :-) sorry Nik, kleiner Seitenhieb...

Vor Medellin simer füf Nächt im Kaffeeland vo Kolumbie xi! Kafi heisst hie Tinto (Tinte), wius meh gfärbts Wasser as Kafi sigi... 90% vom guete Züügs wird exportiert, dr Räschte bhaute si für sich! Das heimer in Manizales, üsem 2te Stopp usegfunge! Dert simer ufne Kaffeeplantage und hei eh Usflug  ine Nationalpark gmacht! 

Vorhär simer im Valle de Cocorra xi! Imne Käffli wo Salento heisst! Das isch bekannt für sini schöne Landschafte u riesige Wachspalme (Nationalboum vo COL). Dert simer ga loufe und hei Bekanntschaft mitemne röidige Rudel Tölene gmacht! Di si nis nach ca. 5min übere Wäg glüffe u hei sech (we si nid gad z'füft ufs einte Wiibli ghocket si) mit üs abäuä beschäftiget! Nach ca. 40min hei mer se chönne abhänkä und angerne Wanderer adräie :-) am Ziel acho heimer eh heissi Schoggi bercho und Kolibris xeh! Nach ca. 15 min si de es Päärli usem Oschte rennend dr Hügu düruf cho! Im Schlepptou: Tölene wo schiins nach ne gschnappt hei! Soweni Fleisch wi ds Bäbi a ihrne Haxe het gha, chöi mir üs das schwär vorstöuä... Dr Buur dert im Hüttli het de dHüng verjagt u mir si churz druf abe wiiterzoge! Nach 10min het üs de zPäärli voller Elan überhohlt u mir hei sr us de Ouge verlore! Bises zumne Hügu isch cho, wo de dr Pfuus schnäu isch usgange (vor allem wiu si vomne Bellkonzärt obe am Hügu si erwartet worde)!

Jo, das wäre üsi Erläbnis xi vo de lezschte Täg!

Gniesset dr Summer! Dä isch ja gloubs iz ändgültig itrudlet...

Ansch & Ürsu

Ps. DFöteli si das Mau unger und unkommentiert! Irgend öppis het gspunne!

Viva Colombia

Ja, es git ou hie no Seftle! 0.5l Brombeeri-Saft

Dir wunderet nech sicher wis üs geit und wo mir si!!! D'Antwort isch, es geit üs (wieder) guet u mir si in Kolumbie!

Gnauer xeit in Cali! Hie isches nach ca. 4 Mönet Kühle wieder Mau u huere heiss! Dr Schweiss louft üs nume so abe und mir hei uf üsere Reis no nid glehrt mit dr Hitz umzgoh...

Geschter simer ufne Hügu glatscht wo plötzlech eh Wagekolonne mit ca. 30 Bulle isch azruusche cho! En Ambulanz u eh Journalistetross si gfolgt und irgend eh Schnouzbärtige (geng di Schnöiz) Typ isch usgstige! Wimer de hei usegfunge isch das Mandli dr kolumbianisch Vizepresidänt xi! Naja... Heimer aso ou no das xeh...

Laguna de Cocha (oder so irgend oeppise...)

Kolumbie isch im Übrige landschaftlech extrem schön! Und es het ou Fauna... Chäfer wo sech bir Ansch igschliche hei u zure chötzerige Nacht gfüehrt hei! Si het aber ou das überstande und iz gits de scho glii wieder es Poker (zBier vo hie)!

Stachel-Kater

Was heimer no z'brichte? Säru u Fäb, hei hie eh Busle xeh wo öiem Junior öppe würd dHüehner itue ;-)













So, das wärs!

Gniesset dWermi und dBraderie und göht mit dr Busle eis go ziäh, das si nid post-travelling desease berchunt ;-)

Aequator-Blog

Es wird Ziit fuerne letschte EcuadorBlog (das Mau mit Foeteli)!

Mir hei dSpuckbasis Quito as Usgangsort fuer Usflueg gno und hei as ersts dMitti vor Waeut bsuecht. Eh chliniTouristeattraktion mit u huere wueestem Daenkmal. Aber weme scho Mau da isch, werum nid? Mir si is, wi das Foti zeigt, nid einig worde weli Hemisphaere di besseri isch :-) dAnsch isch immer no der irrige Meinig dNordsiite sigi di besseri! Si wott mit Kolumbie, USA und Kanada punke!

Am Abe simer de in Quito id Moescht u hei muesse feststelle, das nach 5 Moenet ohni usreichend Wucheaendtrinke dUeebig faehlt! 1.2l Bier und eh Mannedrink hei fuernes Damerueschli glaengt.

Naer simer uf Otavalo (oder so) ane Maerit wos naebere Million Wiisbrot (Nicu Wort fuer Tourischte) fuers shopende Kampfllama einiges gha het! Fruendinneli, dir doeft nech froeie… Uersu Kollege machet nech scho iz gfasst, es git NUED!!! Er meint, das sini Rueckkehr as Grossereignis mueessi laenge :-)

Am Sundig isch Quito tod wi Baern ohni Baeregrabe… Drum hei sech de di japanische Rotchopfaffe wieder Mau ine heissi Quelle ufgmacht. Dert acho het der wiiblech Aff nach fuef Minute afah raue: “s’isch z’heiss”, “i ha scho lieber dr See”, “i ha Hunger”, “das chline Andemandli het mi bim Schwimmversuech agspruetzt”. Drum heimer de nach 2.5h ds Wiite gsuecht. Was mer im Uebrige ou no gmerkt hei isch, das der Suedamerikaner des Schwimmens nicht maechtig ist. Des Weiteren macht eh Uebermaengi a Riis, Pommes und Hueehnli eh Ranze! Das heimer ou im Radio bestaetiget uebercho! 48% vo de Manne und 37% vo de Froue hie in Ecuador si uebergwichtig. Drum heimer ues nach der Rueckkehr in Quito gad eh Donut im Doenking Doenut inezoge!

Ufem Rueckwaeg heimer ueberigens eh Mitfahrglaegeheit gfunge wo vor Froeid das mir Schwiizer si, sini Ussprach nuem im Griff het gha und dAnsch gad as ersts mitere Spukeflugt erfroeit het :-) dr Uersu wo uf dr Rueckbank zwuesche drue Suedamerikanische Schoenheite (er fingt im Uebrige das dEcuadorianerinne di schoenste Chatze si bis iz), het g’angstet, wiu dr Fahrer meh hingere statt uf dStrass gluegt het! Wos de zum zMittag eh Halt het gaeh, heimer Riisuus gno und dr Bus gno!

In Mindo simer ou no xi, das isch es haerzigs Kaeffli im Dschungu gad ir Noechi vo Quito. Ded heimer uebernachtet und si erfougriich ga Guiness-Voegel (Tucan) sueche! Canopy heimer ou no gmacht! Dr Chrigu foht jab i daem vor Angst immer afah zittere, drum sig ihm hie Mau Genugtuung gegoennt: am Uersu hets Gstaeutli “liecht” id Handles gschnitte! Und da dir aui uf sini Handles gspannt sit, hier der laedirerte Liebeshalter :-)

 

So, das waers oeppe xi vo Ecuador! Iz geits i Norde! Viva Colombia

Ansch & Uersu

Ah ja, Schmetterlinge hets ou no gha in Mindo - Leeecker

Spuckblogg

So, s'isch wieder Mau Ziit fürne No-Picture Blogg!

Wi dr ja mittlerwiile wüsst si mir iz in Ecuador und geschter in Quito acho! Hie gits eh interessante Tier-Mönsch Mix: der spuckende Andenkrieger (nid ds verwächsle mitem spöizende Llama)! Das Wäsä spöit Lüüt ah für se usznäh! So geschehen heute!!!

Dr Ürsu isch dr Hügu derufgwatschlet und get plötzlech eh Spuder xeh näb sim Chopf düreflüge! Churz druf abe isch ou dSchultere nass worde! Dr Plan wäri xi, das me sech frustriert umdräiht, woruf dr Kolleg mit gekonntem Griff i Hosesack längt für (nei nid für am Schnäbi umezspiele) nach Wärtvouem z'sueche! Leider isch dr Plan misslunge! Dür gsammleti Erfahrige mit Chötzlis in Buenos Aires isch dr bespuckti nid uf dä Trick inegheit sondern het ar Ansch seeleruhig xeit me mög doch bitte i nächst Lade ine! Dert hei is zwöi Poliziste aghoue und xeit si heige aus xeh! Drufabe heimer eh Polizeieskorte bis zur nächste Sehenswürdigkeit bercho!

Passiert isch nüd, usser dr druffolgendi T-Shirtwächsu und dr Ürsu wo beleidiget isch u fingt das o Mau dAnsch chönt agspöit wärdä!

Häbäts guet u keh unsuubere Flüssigkeitsuustuusch!

Galapagos

Zrügg vo de Galapagos heimer is wieder Richtig Ande gmacht u si iz in Riobamba uf ca. 2800m obe!

Marine-Iguana am Suennele

Mir hei eh Dreitages-Schifftour uf de Insle gmacht und auerlei Getier gsichtet! Seelöie (nach de Llamas ar Ansch ihri absolute Favorite), Marine Iguanas, Blaufuesstölpel, Pinguine, Rieseschiudchrote und sogar dr einsami George, dr letscht Schiudchrot vo sire art! Ufem Schiff hets luuter komischi Gstaute gha! Zum einte heimer eh Mr. Bean Vrschnitt gha, wo chrampfhaft Aschluss gsuecht het und zum angere eh fronsösischi Führerin (mit sehr französischem Akzänt) wo üs ging mit ihrer Ussprach erheiteret het! Unger angerem het si eh 'Sii-Liön Sköll' (Sealion Skull aso Seelöiischädu) xeh und üs uf 'se top of si häiländ' (nei, nid is Hochland sondern zum Spitz vor Insu) gfüehrt! Geil a de Viecher si o ihri verschiedene Eigearte: dr Blaufuesstölpel cha zum Bispiu flüge (was dr Ürsu sehr erstuunt het) und tanzt eh Art Goblintanz mit sine blaue Füess!


D'Fregattvögu hei eh huere fette rote Chropf wo si chöi ufblose we si rattig si! Und dMarine Iguanas niesse Salzwasser weme ne zNöch chunt! Nöch cho heisst im Übrige uf de Galapagos eh Armlengi! Tier hei 0 Angst u finge üs gloubs eifach koomisch...

Nach volländeter Tour heimer is de no ungers Wassee gwagt und si go touche! Dert heimer Meerschildchrote, Seelöie, verschiedeni Riffhaie und zwe Hammerhaie xeh!

Dr gwuenschti Toelpel, Nadi!

D'Galapagos finge mir sehr empfählenswärt, wi im Übrige aus vo Equador womer bis iz xeh hei!  Und me cha guet vo hie us sini Galapagosreis bueche... Auso uf dReiseliste ufnäh!

Span-Schwoin! Laeckerei!

Iz simer wi xeit in Riobamba wo sech dr Ürsu ame Lechon (Spanferkel und dSpezialität vo hie) wott güetlech due! Dr eigetlech Grund für üse Bsuech isch dZugfahrt über dNariz del Diablo (Nase vom Tüüfu)!










Ansch & Ürsu

So, soett dr Schnouz usxeh :-)

Ps a üsi geliebte Vättere: da dir ja geng no uf öii Schnöiz bestöht, obwou die sit Jahre out si, bitte mir öich, nech doch wenigstens a de Seelöie es Bispiu z'näh u so eine z'kultiviere ;-)