Gaucho

Gruessech

Mir si guet in Argentinie acho... nach uesem letschte Post simer zu de Iguacu Wasserfaeu und naer wiiter ueber dGraenze fuer se no uf dr angere Siite go zluege... isch super xi und mir haenke nech unger gad no es paar Foeteli ah...

Vo dert us simer naer wiiter Richtig Suede und hei ues entschiede no i sone Nationalpark zgo wo, pardon the expression, am Tuefu im A..... isch xi... dert hets Garpichos... und fuer die wo nid wuesse was das isch, das isch es Wasserschwoin... hie es Biudli...

Ah, nei... ganz fautsch... natuerlech si di Dinger viu haerziger as das komische Borstenschwein uf daem Biudli... hie z richtige....

















Es isch im Momaent ungloublech heiss hie... mir wuesse, dir weit das sicher nid ghoere, aber mir muesse ja glich irgend oeppis verzoeue...

passiert isch is im ueberige no nid wuerklech viu dumms... geschter isch ir Mitti vom Nirgendwo dr huere 5000 jaehrig Bus abglaege und mir hei dae mueesse aschiebe, was natuerlech nid gange isch und drum het ues  naer irgend eh Pick up wo oeppe glich aut isch xi mueesse abschleppe (im Uebrige naerve di Tastature hie u huere, wius kes Aeh, ueh, und oeh het... das brucht me irgendwie no viu)... huet simer naer hinger uf em Pick up ghocket fuer wieder zruegg is Dorf cho und me cha saege, weme do zweni Fett am Fuedli haetti gha (was ja bi ues nid dr Fau isch), de haet me aeuae blaui Flaecke dervo treit...

Guet... viu meh bliibt ues nid z verzoeue... hie hets no es Foeteli vo deWasserfaeu...

was mer as naechsts plane isch richtig Suede zga... isch chli mueehsam wiu mer hie wuerklech im Nirgendwo si... aber naer geits no 3 Kaeffer wiiter und uebere uf Uruguay womer wei go luege was di Urus so mache... naer per Schiff uf Buenos Aires und vo dert us Richtig Patagonie...

mir hoffe es geit oeich aune guet...

Liebi Gruess

Ansch und Uersu

ps... ah, natuerlech... mir hei ou no Nasebaere xeh... ganz, ganz geili Sieche... dr eint het ame dumme Tourischt suber zSandwich klauet und angers verputzt...

Post Numero Uno

Ahoi aus Sao Paolo

Uf Wunsch vo viune Luet hei mir ues entschiede ou eh Blog zmache... dAnsch fingt das zwar pooplig, aber guet... i probiere mi iz eifach Mau dra zsetze und oeppis schlaus zkreire...

ZRebi het ja vorgmacht wime eh guete Blog macht wo aui immer goe go aluege und drum duee mer ues iz a ihre orientiere *s*

Wi dir wuesst si mir jo in Brasilie... dem Land der Caipi Trinker... und da Caipies as Mannedrinks gaeute, wuerd sech dr Goetschi hie sicher sehr wohl fueehle...

Mir hei is drum entschide (mit liechter Saeubstironie) es Biudli vomene soettige, rare Examplar wo mer im Wald hinger Paraty xeh hei z veroeffentleche... bekanntlecherwiis soeu me ja is Internet nume Sache stoeue wo me cha vertraete, und das Biud isch sicher so eis... Muahaha...

Posierender Monkeyboy

Mir waerde huet Nacht Richtig Iguacu Falls freese und dert Mau go luege was so abgeit... hie haetteter no 1 Biudli us Rio, eis us Paraty und eis us Sao Paolo... uesne bishaerige Destinatione...

Ausblick aus unserem Hostel in Rio

Wasserratte im (Suess)Wasser

Wasserrutschbahn (oder Uersus Discofuedeli) in Paraty

Sao Paolo Aussicht

Ah jo... was me ou no muess saege... Brasilie isch super und sehr sympatisch... dLuet si huere kuul und es faegt... nume leider isch ihri Sproch eifach es Gmisch us Uagadugu und Suaheli... me versteit genau oeppe gar nued... Aber wi xeit... sehr sympatisch und hiufsbereit si si... Urs het natuerlech gmeint mit sine Supersprachkenntnis waerde ne hie wiiterbringe, aber ou aer versteit NUET!!!

Mir hoffe das isch nid huere laengwilig xi und wuensche oeich eh gueti Ziit... bis zum naechste Mau

Ansch und Uersu

ps. Da Urs ja nid Informatik studiert het, erwartet sicher ou niemer das das Ding guet usxeht... haha.... me cha ou saege das mer es haubs Vermoege heiusgaeh bis mer di Scheisse hei haerebrocht... es angers Mau heimer sicher meh Ziit und chane no chli verschoenere... oder s aemu Mau probiere... hehe...

pps. Mir waerde ues Mueeh gae di Sach interessant z bhaute und ou ueber Usruetscher und suestigi dummi Sache z brichte... uf das warte ja aeuae aui...

ppps. mir hoffe, mir finge de dae huere Blog a uesere naechste Destination wieder... und: es het eh iboute Zaehler... faus mir xeh das dir nid astaendig interessiert sit, waerde mer das Ganz entbloge... verstanden?

pppps. Fuer aui di Unwuessende oder auch Outsider... Wi vermehrt erwaehnt und ou ufzeigt (vgl. Bild 1) aehnlet Urs´s Figur einer BIRNE... oder usduetscht, er het usuuferndi Lovehandles, sprich Hueftgold... daher der Name dieses Blogs... mir wei doch aui dokumentiert ha, winer ufgeit, wines auts Cupcake uf dere Reis... das isch jo eh wiitere Grund werum dir dae Blog alueget...

ppppps. mir hei eigetlech nuemme z saege, aber ha no einisch es ppppppppp woeuae schribe...