Vo Las Vegas, Töipele u Hitzeperiode...

Ufem Waeg i Pizza Hut

Nach LA u San Diego heimer üs i Joshua Tree Nationalpark gwagt! 500'000 Grad hei is bi lebändigem Liib la schmelze und mir hei däm mit Poolbsueche, 2 Pint Ben & Jerry's Glace und eme Monstercascho Dos X (für nid Mexicaner z'zwöit beschte Bier us Mexico) entgägä gwirkt! Mer heis chuum gloubt, aber es het eh Mount Ryan i däm Park gha (eh Bewiis das z'viu Sunne eidütig am Hirni schadet - wär git eme Bärg scho so ne Name)! DSara heimer knapp dervo chönne bewahre ne z'bestige ;-) mir heis de bime Foti la bewände!

Stachelkaktus im Joshua Tree NP

Im Park hets o no ganz geili Kaktüss (Ah nei, Kaktee) gha wo bir Berüehrig ihri Stachle gschosse hättä! Us nachevouziehbare Gründ heimer das nid teschtet!









Vom Nationalpark simer uf Las Vegas gfreeset! Dr Sündepfuhl vor USA het de eher spielsüchtig veralagte Churzziitreisende besser gfalle! Unmängine Gäud si igsetzt worde! Wohingägä di Langziitreisende eher moderat gspiut hei... Dr Ürsu het bim eiarmige Bandit für Pennies gspiut und isch fasch düredräiht daser komischerwiis keh Million usezoge het! D'Ansch het dSpändierhose agleit und 4x 10$ (Mindestisatz versteit sech) bim Roulette igsetzt! Entgägäm Äschlimaa sim Rat moderat und verteilt z'investiere het si jeweils eh 10er uf ei Farb gsetzt! Nach 4 Rundinne isch dr Gspass fertig xi!

Mit Skull-Mug in Las Vegas

Zum Grücht me chönn Gratis suufe weme spiut chöimer fougendes sägä: dAnsch u dSärlä hei am Roulette Tisch eh Margharita chönne bstöuä! Da me ja wott das dSpieler möglechst lang am Tisch bliibe, geits aber ca 3/4h bis dr Drink atrabet chunt! Üsi guet betuechte Dame hei bis denn scho aus verlore gha und ds Wiite gsuecht! Dr Chrigu het derweil am Black Jack Tisch knapp 3h usgharret! Und: es Wasser trunke! DAspannig isch so gross xi, daser sech när gad ufem Kasinolokus het müesse ga entläärä! 2h später heter de dr Däumling gmacht u isch ga pfuuse! Bi de Juriste füehrt konzentrierts Arbeite über meh as 2h offebar zu Erschöpfigsähnleche Zueständ! Zu CLs Verteidigung (und ou dene vo de Juriste) muess me sägä, das di grossi Konzentration offebar Frücht treit! Ds Mandli het si 200$ Iisatz vereinehalbfacht - müesst dr Rächner fürenäh für di aspruchsvolli Rächnig... Im Übrige müesse aui Heuschrecke deheim gar nid wöuä ga bättlä, ds Gäld isch scho investiert und zwar i üsi Büüch. Mir si zum zNacht iglade worde!!! Schad isch nume, das dr Dollarkurs so töif isch, süsch wäret dr vilech o no zum Zug cho! Er het aber mit sim Iisatz es paar Sache bewiise, resp widerleit: wer wagt gewinnt und das Kasino gewinnt NICHT immer! Meh as aus angere beruhigt üs aber, das di juristische Konzentration offebar förderlech isch! Mer müesse aso nid um üses Rächtssystem fürchte...

Derweil isch der Wütherich mit sire Chatz no es Musical ga luege: Lion King! Trotz viel Tanz u Chatzegjammer heter müesse zuegäh das das Ganze keh Seich isch xi... ;-)

Nach Vegas simer wiiter uf Santa Clarita womer im Chino si xi: Captain America! Eh Rieseschwachsinn wo nume mit 2l Cola und eme Riesechübu Popcorn z'bewältige isch xi!

Jawoll, so schlimm si di Bahne dert xi...

När simer i Six Flags Magic Mountain Vergnüegigspark. Aus Gjammer het em Ürsu nüd gnützt! Er isch mitgschleipft worde! Das wieder einisch nid nach sim Chopf isch gange heter de töipelet u bi jedere Bahn Zeeter Mordio gschroue! Dr Achso tapfer Chrigu het nume di schlimmste Bahne wöuä mache! Nach zwe heter scho Chäppidruck gha und dSara auf Knien um nes Ponstan agfleht! Am Abe hets de no eh Lobster gäh und me isch früeh is Bett... Dert isch dr Chrigu wiitergfahre und het sech im Bett gwälzt wi wener geng no ufeme Rollercoaster wär xi! Das het sech bis is Outo am nächste Morge wiiterzoge! Nach 15min het dSara müesse fürehocke! Di ruppigi Fahrtwiis vom Herr Lienhard (äuä no vom Vortag) het ihre ohnehin (äuä vom Vortag) gschädigt Körper zum rebelliere brocht! Di letschti Bahn het üsne Schädle übrigens dr Räscht gäh und mer zGländ fluchtartig verlah!

Ben & Jerrys Girl

Iz simer de gad in Sta Cruz, üsem vorletste Stopp!
Bis bald

Sara, Ansch, Chrigu, Ürsu

Captain America

Captain America

Mir si guet u glücklech ir USA acho, womer vo Sara u Chrigu am Flughafe si abghout worde! Per sms het dr Chrigu mitteilt das dImmigration schnäu wärdi gmacht si... Bimne Flugi vou Andechrieger isch das aber eher nid dr Fall! 1.25h heimer müesse warte! Rhetorischi Frage wi 'you are from Switzerland?' (di richtigi Antwort druf wär: yeah, I am from Sweden), heimer tapfer über üs lo ergoh!!!

Im Hostel heimer de festgstöut, dass me üses Zimmer het vergäh u eine am Bode het müesse pfuuse. Ufgrund vom höche Alter u dr Gebrächlechkeit vo de alte Manne het sech dSara fründlecherwiis bereit erklärt 1x am Bode u 1x ufere Matratze z'pfuuse (jaja, Ryan! Mir gäbere Sorg)! Me het is sogar no bim Priis wöuä übervorteile, aber mer hei üses Kampffuutiär ad Front gschickt zum das regle!

När simer uf San Diego gfreeset! Dert hets öppe keh Platz ide Ungerkünft gha wiu eh Comic-Event isch xi! Eh Rieseasammlig vo Nerds mit dicke Brillegleser u no dickere Büüch! Tickets si sit Monate usverchouft xi u drum hei sech dFroue entschide dr Chrigu u dr Ürsu miteme Shoppingmarathon z'foltere! Mit brönnende Schuesohle simer de uf Little Italy (wo si, wi dr Götschi z'sägä pflegt, meh wüsse as angerne Orte) gwatschlet! Dr Chrigu gmüetlech am röikle isch de vore Gruppe Ami-Froue (besser bekannt ungerem Synonym Little Tart für kleine Torte) ufgforderet worde ihm es High Five z'gäh! Z'Grummelmonster het eh töife Zug vo sim Glimmstängu gno und dänkt High Five my Ass! Ds Nid-Igah uf ihri Forderige het dAmichatzene veralasst üs es: whaaaat? No high five? Fuck you, guys! Hingernache z'rüefe! Das widerum het am Ürsu so gfaue, dasers iz bis zum Exzess repetiert! Das, ir Kombination mit sim Driischnurre bim Fahre, het dReisegruppe veralasst ihn i Kofferruum z'gheie! Somit fahre iz ir Füehrerkabine drei Mönsche u vier Köffer...

Wiiter gits z'brichte das Chrigu das blinde Faultier am dritte Morge sini Linse inegmechet het u isch ga z'Morge mampfe (xund hie: Muffins und Filterkafi). Bim Zrüggcho heter nachemne churze Blick is Linsedösli verzwiiflet festgstöut, das Wasser und Linse furt si xi! Nach füf Minute närvösem Sueche heter de erliechteret festgstellt, das är ja dLinse scho drinn het!

Im Zoo simer ou no xi! Dert simer meh dri ine grütsch! Mir hei i Mac wöuä! 50 Chicken Nuggets für 10$ ga ässä (D'Ansch hätt de es Sööseli döffe ha)! Wos die nid gäh het, hets Mandli afah stämpfele u di drü angere usem Lokal gjagt! Fasch verhungeret hei sech dHyäne uf dJagd nach Ässbarem gmacht u si drum im Zoo glandet! Näbst vile kuule Tier hets ou öppis Xunds (Burger u Hotdogs) z'ässä gäh!

Jo, das wäre üser erste Idrück! Bis zum nächste Mau (äuä de usem Sündepfuhl Las Vegas)

Sara, Ansch, Chrigu & Ürsu

Ps. Mir wüsse dir sit scharf uf Föteli, aber mer hocke do gad ir Wüesti u drum chöme de baldmöglichst es paar!

Der letzte Streich

So. Es geit zÄnd mit üsem Ufenthalt in Südamerika! Nach über 500h i Busse heimers nach Bogota gschafft vo wo mer morn wiiter uf LA flüge! Einersiits simer chli truurig, angerersiits ou froh, wius iz de langsam glängt het mit de Busse :-) iz erwarte üs drei Wuche Bsuech und es Outöli für di nächste drei Mönet!

Aber mir mache hie ja keh Vorschou, sondern eh Rückblick. Drum no vo de letschte Täg:

Rafter-Ansch

Rafte: mir si in San Gil no go rafte! Super xi und ordentlech Stromschnelle und Wasser gschlückt! Üs hets nid usem Böötli gspickt, aber usem angere Raft hets zwe Buebe drus gheit!

Ameise: in Barichara heimer no eh Läckerei atroffe - Hormigas Culonas! Übersetzt: Ameisen mit Riesendiscofüdis! Dr Örsel het die natürlech gad müesse agriffe und es Steak in Ameisesoose bstöut! Läääcker!

Ameise-Steak

Panaderia Francesa: im nächste Käffle, Villa de Leyva, heimer nud allzu viel gmacht! Houptsächlech wius di ganz Ziit gseicht het, was mir gar nüm kenne! Nennenswärt isch dert eh Bäckerei xi wo Läckereie bachet het! Dr Ürsu het sech nüm gspürt: Schoggibrötli, Croissant, Mandelgipfeli, Quiche und eh Schnägg si vernichtet worde! Guet fürs Gemüt und guet für die Hüfte...

Barichara

Angriff: in Bogota acho, heimer wieder Mau is Chino wöuä und is ufd Socke gmacht! Churz vorem Chino het sech eh Gruppe illustri Gstalte a üsi Färsä gheftet! Wohl mit der Idee üses Chinogäud ds entwände! Aber mir hei se xeh u si plötzlech blibe stah, hei nis umdräiht u si fasch i se ineglüffe. Das het se offebar verwirrt :-) när heimer gwartet u gluegt was si mache, hei dStrassesiite gwächslet u prompt hei si ou gwächslet! När heimer 2 Poliziste xeh u si hinger dene nachetüsselet u i Chino! Nume leider isch nüd uf Änglisch cho *grrr*

Partybus: am Fritig het de üses Hostel eh Partybus organisiert wo mir üs agschlosse hei! Nach irdentlech Rum und Aguardiente (Pastis in Wüest) het dAnsch eh Stogu uf dFlosse bercho und sech mitemne Rempler revanchiert! Was mitemne abfällige Tussihandgeschüttel isch gutiert worde! Derweil het sech dr Ürsu i liecht atrunknem Zuestand mitemne Mandliusem grosse Kanton ungerhaute! Ir Völli inne het är nid bemerkt, das das Mandli anger Idee gha het as nume ds rede (bhouptet dAnsch)!

So... Das wars von hier! Mir hoffe dir heit üse Südamerika-Blogg gnosse und mäudenis mit Nius us de Staate! Dert wirds de äuä weniger spannend, aber sicher amüsant mit de Gringos!

@ Sara und Chrigel: bis am Mändig! Mir fröienis! Chrigu, schlaf no us, du weisch, kener Antarktistemperature heisst ou kener Usrede mitem Trinke! Ah, mir hei äxtra für di no nes Kilo Mate-Tee kouft u probiere ne id Staate ds 'schmuggle'! Cocabletter heimer schweren Herzens müesse ussortiere!

@ Säru und Fäbel: guete Flug ire Wuche und bis i zwe Wuche in Frisco! Fäbu, gisch de ar Säru es Wiili gägä dFlugangst :-) Mir fröienis latürlech o uf öich!

2. letst...

So, eine vo de letschte Südamerika-Blogs isch nache... Evtl gits no zwe, faus nüd ussergwöhnlechs me passiert äuä nume no eine.

Eh letste Blick ad Karibikkueste

Zersch Mau wette mer am Chevreuli (Reli) gratuliere! Si het bim erste Versuech und as einzigi usegfunge das di gsuechti Frucht eh Maracuia (Passionsfrucht - ja di bruune, verschrumplete bi üs) isch! Si chunt somit i Gnuss vomne läckere Maracuia-Mannedrink! Des Weiteren wärdä o Nicu und Müre belohnt. Mit exotische Tipps wi Birre, Pomelo, Grapefruit, Pepino, Sapote (wtf is that?) oder spanischer Melone si si zwar meilewiit drnäbäglägä, aber mer wei ihre Isatz würdige...

Wasserfau in San Gil

Mir si vor Karibikküste und der Hitz gflüchtet und hocke iz wieder uf knapp 1500m obe! Langsam wirds Ziit das mer dr Kontinänt chöi verlah! Üsi Usrüstig laht la gah... Am Ürsu sini Hawaiianas us Rio hei la gah wonär über ne Randstei gheit isch... Eh Zäihenagu und Schürfwunde hets o no nach sech treit und das aus ohni Alkoholiifluss... Zrügg im Hostel het me de as ersts dFüess müesse dekontaminiere wo nach 500m schwarz wid Nacht si xi! Mit Stärnfade het me de probiert ds Läbä vom FlipFlop z'verlengere... Da das Ding hert het gha het ds Mandli Zähn zur Hiuf gno und natürlech es Stückli abbroche! Dr FlipFlop läbt ämu no :-)

Ufem Wäg vo Sta Marta nach Bucaramanga hets ne de bim biisle im Bus so umegschlängget daser dr Geldgürtel derewäg atätscht het dases dSchnalle abtätscht het und die natürlech no gad im Lokus entschwunde isch... Somit wird dä nüm gflickt :-(

DBusfahrt isch im Übrige statt de akündete 9h, 13 gange und mer si dankbar dases nume no um di 200km (aso ca. 10-12 Busstunde) si bis uf Bogota!

Mir düe hie no chli bedle, Wasserfäu u Dörfli aluege u gö no ga rafte (@ Nicu: Geht ihr raften?)! 

Uersu mit Serious Bart

So, das wärs vo hie! Ände möchte mer mitemne Zitat vomne TShirt vomne kolumbianische Meitschi (ja, si het di entsprächendi Körperfülle gha):

Save the Earth, it's the only Planet with Chocolate

Und ja: mir vermisse dSchoggi vo deheime! Aber natürlech ou dGipfeli, Ufschnitt (aso dr Ürsu ämu), Fondue, Chäs (aso dAnsch ämu) etc. 

Ansch unger Wasserfall

Und öich aui o!

Rebelle und Rum

Quizfrage: Was isch das fuer ne Frucht?

Mir hei eigetlech gmeint, mir chönne di letschte zwe Wuche in Rueh verbringe, aber womer am Busbahnhof vo Medellin si acho heimer schnäu gmerkt das dem NICHT so ist! Womer üses Billet si go zeige für z'frage wo dr Bus  fahrt het me fieberhaft afah am Cömpu umehäckä! D'Route sigi g'änderet worde... Mit 30min Verspätig simer de afe abgfahre und hei usegfunge das 1h nördlech vo Medellin Rebelle dHouptverchehrsachse agriffe hei! Schön... Das het bedütet das dFahrt nid 13, sondern 18h geit! Wi das hie nun Mal so ist, si 18 kolumbianischi Stunde, 21 europäischi!!! O schön!

Cartagena

Gerädert simer de in Cartagena acho! Perle der Karibik für di einte, heisses, füechts Dräcksloch für di angere! Eh wunderschöni Altstadt umrahmt vomne Ghetto triffts äuä am eheste! Hie heimer es Dorm imne Hostel verwütscht (dr Ürsu schwört s'sig sis letschte xi - die Zeit wird ihn eines besseren belehren)! Me merkt das hie Karibik isch, di Reisende hei dManiere und dHemmige abgleit! D'FroueWCs si vo verblüetete Binde oder übergrosse Gagle verstopft, Tüpfis hei roti Minis plus HighHeels mitgno, aber dUngerhösli vergässä! So het geschter eini vo üsne Mitbewohnerinne ihres (haarige, ja, dir läsät richtig) Anüssli bim Schlafe usegstreckt! Di angeri het ds Büppi usem Pischama la hange und di dritti fiislet nackt im Dorm ume und schreit zeetermordio weme inechunt! Ds Mandli näbem Ürsu schlaft mit sire Chatz im Bett (das geit, wiu beidi zämä glich schwär si wi ei Handle vom Örsel) und dued jede Morge churz a ihrem wiibleche Gschlächtsteili umemanipuliere, was si nid gutiert, sech wägdräiht u jedes Mau fasch di 2 Meter vom Bett obenabe gheit!

Fruesche Shrimpcocktail und es Bierli - RIESIG

Gut, genug der wüsten Dinge! Hie gits ou Guets, wi zum Bispiu Mannedrinks mit früscher Mango und Passionsfrucht, reichlich Bier und sensationelle Shrimpcocktails!

Schwoine am suule im Draeck

Hüt simer zumne Schlammvulkan und hei is dert ordentlech drinne gsuulet!

Glii gömer wiiter ines nächtschs Kaff und de irgrndwenn ir nächste Wuche langsam Richtig chüelende Bärgä u Bogota!

Ps. Fuer di ersti richtigi Antwort ufd Fruchtfrag (SMS uf 079 825 78 25 oder 079 631 08 46) gits eh Drink!