It's not over, not over, not over...

Zum letschte Mau es Hallo

Was vor nüün Mönet agfange het ändet iz hie in Vancouver!

Mir hei di letschte Täg ir schönste Stadt vor Wäut (luut Ansch) verbrocht u üs no einisch dür di ganzi Wäut gfrässä! Deheim gits Salat, Suppe u Wasser! Aber ersch nachdäm mer aui vermisste Läckereie wieder zur Genüge idröschet hei!

Es chliises Fazit wette mer doch no zieh:
- ds beschte Fleisch gits in Argentinie (Grillade in Cordoba)

- ds beschte Bier isch Alaskan Amber u Quilmes Red Lager

- ds ultimative Flash erreicht me uf 4000m, bi knapp über 0 Grad mitere Kombination us Bier, Coca Bletter, Zigarette u Mate Tee

- ds beste Fahrende Restaurant: im Yellowstone im Wägeli bi Mama u Papa Kaenel

- ds beste Hostel: La Hola in Copacabana, Bolivie

- die coolste Seelöie (nid zum ässe, sondern zum spiele): Peninsula Valdez, Argentinie. Abr aui anger si ou super duper!

- dr best Burger: Super Duper, San Francisco

- dr best Veggieburger: Ritigampfi-bar in Mindo, Ecuador

- Best Drink: früsche Maracuyasaft mit Röm (säuber gmixlet), Taganga, Colombia

- die schnüsigste Hochlandtier: L(L)AMAS!!!

Aber zum Schluss wette mr nech no zwe Anekdote zum Schmunzle mitgäh!

In Vancouver hets relativ viu Obdachlosi/Drogesüchtigi und entsprechend wird me ou ging öppe für Gäld aghoue! Das geit de zum Bispiu so: hello, can you spare 5$ (nid eine, nenei, 5 wott me)? We me de grosszügig eh Loonie (1$ Münze in Canada) zückt, chunt me zur Antwort: Oh my god, only one Dollar? Jo, bitte, s'isch gärn gscheh!!!

Des Weiteren gits hie ou Vögu in rauhen Mengen! Tuube, Spatze, Möve, allerlei! Inkl emne ganz fräche, pünktlete Siäch! Di düe de dTierliebhaber gärn füettere! So ou dAnsch! Si het i Giit ine ikouft u gmerkt das si nume 1 Gipfeli u 1 Brötli ma (nid 2i wi si ikouft het)! Drum hets de dr eint oder anger Krümmel gäh! Das het eh Voguschar aglöckt! Dr Ürsu, ihr Entzückig ab sim Schinke versunke, het de das nur ungenügend zur Kenntniss gno und entsprächend ou dr Vogu wo sech im Sturzflug uf si Schinke gstürzt het ersch bemerkt woner sech mitem halbe Schinke usem Stoub gmacht het... Sithär bhoupteter, er heigi Vogugrippe :-)

Geschter isch me de uf Geheiss vom Herr Bussinger (o bekannt as Klösschen), is Shabu-Zen ga Fressi-Fressi mache! Z'All u can eat Sushi het (und iz Obacht), dr Ürsu so entzückt, das ihm es 'i liebe Vancouver' entwüscht isch! Zwe Stung später, woner sech mit vouem Ranze ufem Bett gwälzt get, heter de müesse feststöuä, das är weder eh Seelöii, no eh Seeotter isch: z'viu rohe Fisch berchunt sim Mage nid :-)

Jo, das wäre si, üser letschte Idrück vo dere Reis! Mir hoffe, mir heige nech mit üsem Blogg chli chönne lah teil ha a üsne Erläbnis! Mitemne lachende u emne tränende Oug chömemer iz hei! Ds lachende, wiu mir üs fröie öich aune wieder uf dNärvä z'ga, ds tränende wiu iz doch scho aus düre isch! Mir mögte no, drum seid gewarnt... Mir si glii wieder wäg!!!

Bis bald

Ansch u Ürsu

Quiz zum letzten...

Aso... hie waer no einisch das Foto vom VW...

Und hie si no einisch dHiiwiise

1) Es het drei Buechstabe
2) Me cha öppis inelah u de berchunt me öppis zrugg
3) Me het när weniger as vorhär

Fotos im Nachtrag

Hie wette mer oeich no dFotos vo de letschte Taeg und Wuche nochereiche... As ersts heimer Mau dPetra im Holz verewiget entdeckt und ar Busle ou no es Foteli woeuae widme :-)

Naer heimer unger bi Ucluelet am Pacific Rim dae geil Seeadler xeh und choenne foetele.. Mer hei natuerlech kei Akku meh ir Kameria gha, aber mir hei oepper gfragt wo di glichi Cam het gha und ne doch no choenne foetele...

Bim Whale watche heimer no dae Buckelwal xeh abtouche

Und dr geil Seeotter wo sech am putze isch xi...

Z Victoria het de dr Uersu ir Happy Hour no es paar Ouschtere vernichtet

Und am Open Air womer der moenschlech Skunk hei xeh

Und Schlussaendlech simer no mitem Tucan zaeme uf dSpace Needle in Seattle. Er het is fasch vom Turm woeuae abfluege, aber mer hei ne choenne zruegg halte!!



Dr Iz-längts-de-Blog...

Ahoi - mir hei kes Internetkafi gfunge u beglücke nech drum wieder Mau mitemne Blog ohni Föteli :-) mir hoffe mir finge no eis u chöi paar ufelade...

In Tofino simer no go Whale watche! Ei Bugguwal heimer xeh! D'Ansch het ne sogar xeh gumpe, dr Muulwurf het süsch nöime härägluegt u natürlech nume no ds Wasser xeh ufsprütze! Drfür heter de no am Wal sini Schwanzflosse bim abtouche gfötelet! Voller Stolz isch de dWasserfläsche agsetzt worde! Säubstverständlech ufem Wellenkamm... Wo ds Böötli de im Tal ufgschlage isch, heter sech di haubi Fläschä über dHose glährt! Sehr zur Fröid vom schadefröidige Stinktier (und sicher o vo de Blogläser...)!

Eh Reiseteilnähmer (dr Ürsu nid, dä het Stugeron gworfe u dAnsch isch ja as alte Sägler Seefescht) het de dWäuä nume bedingt guet vertreit und sis zMorge de Fischli gfuetteret! När simer no zu so Hotsprings und hei wieder Mau di japanische Affe gmacht. Ca. 5min ischs gange bis dAnsch het afah rauig due und me fluchtartig di agnähmi Wermi het müesse verlah! Ufem Rückwäg heimer de eh ruhigeri Passage gno u dert no geili Seeotter xeh, womer sogar hei chönne bim sech putze fötele!

Z'Victoria heimer de xeh dases es OpenAir het u das natürlech gad is Programm ufgno! Ds Wätter het mitgspiut u mir hei eh letste Summertag verwütscht! Näbst Musig, Bier u Fressi-Fressi, heimer is ou no mit People-watche beschäftiget! Dert heimer ou das Exemplar xeh: eh Homo Skunkus! Das menschliche Stinktier!

Wiiter heimer no dä huere geil VW-Bus xeh! U üses letste Rätsu geit um dä! Was macht sone geile Hagu ufem Festivalgländ? Drzue drei Hiiwiise:
1) Es het drei Buechstabe
2) Me cha öppis inelah u de berchunt me öppis zrugg
3) Me het när weniger as vorhär

Iz simer in Seattle! Üsere 2t-letschte Destination und das Ende naht! Das schiint me ou deheim z'merke! Mir hei iz scho vermehrt ghört: es längt iz de! Zu däm chöi mir nume sägä: ja, mir vermisse öich o, aber chömet doch dir üs cho bsueche :-)))

Ar Bushaltstell sitzend u Kafi trinkend wird me de vore Dame aquasslet wo eim itrichteret (natürlech ungfragt): Anger does something. There is a time to be angry! Das isch eso... Nume nid am Sundig Morge u sicher nid weme eh läckere Kafi het us no schön Wätter isch! Me stöut fescht: die spinnen die Amis!

*biiibbbberrrrrrr*

Niidisch schile mer uf dSchwiiz wiu dir no schön heit u bi üs dr Herbst izoge isch! Bekanntlech zeigt sech dä in Westkanada mit trüebe Täg u Rägägüss :-( Zwüschedüre heimer aber Glück u dSunne güxlet füre!

Makro Raetsel

Aber säubstverständlech löh mer üs nid lo entmuetige! Mir si mittlerwiile uf Vancouver Island u hei eh Zwüschehalt in Whistler igleit! Dert heimer Bärä gsuecht u nid gfunge! Drfür heimer nech es Rätsu :-) was chönti das Makro si?!?








In Whistler simer de ou no ordentlech Gondeli gfahre! Zum das ganze Bärgfeeling abzrunde heimer de ou no im Bärgrestaurant eh Schoggumbo (für Nid-Bettmeralpgänger: eh heissi Schoggi mit Rum) zuenisgno. DFröid isch nume vom stolze Priis trüebt worde :-) 18$ fürd Schoggumbos u 96$ fürs Gondeli! Adieu Batzeli... Deheime heimer is de no is Sprudelbad gstürzt!

Whistler us dr Gondle

Ufem Wäg nach Vancouver Island  heimer no in Squamish übernachtet und dert eh sensationelle Inder ufgsuecht! D'Ränzä vou und ufdunse heinis de chum la schlafe u dr tasmanisch Tüüfu het dr Eskimoroller gweckt u umbekehrt!

Tucan uf dr Faehri

Mit dr Fähri heimer de uf Vancouver Island übergsetzt u nid nume dr Ürsu isch vom Fährifahre begeisteret xi!











Iz simer hie in Nanaimo und hei nis nid ufs, sondern is Meer gwagt! Bi 10 Grad Wassertemperatur simer ga touche! Näbst emne Wrack heimer ou ganz viu Anemone, Seestärnä u Fische xeh! Z'Highlight si aber es Päärli Wolfsaale, eh Tentakel vomne versteckte Rieseoktopus (2-Fränklergrossi Suugnäpf het dä gha) u es Algewäldli xi!

Nanaimo Bar

Mit zitternde Glieder u abgstorbne Zäihenegu heimers de no knapp unger di rettendi Duschi gschafft u blogge iz usemne Käfeli womer es Teeli und eh Nanaimobar vertilge!

Das wärs! Chao

Ansch & Ürsu

Vo See u radelnde Anüs...

Rockies bi Banff

Mir hei is wieder uf id Wildniss vo de Rockies gmacht. Das Mau aber nid mit dr Hoffnig uf viu Tier (okay, dr eint oder anger Fällchnöiel hätte mer scho gärn xeh)!

Lake Louis

Derfür heimer es paar sensationell schöni See xeh! Unger angerem dr Lake Agnes womer 1h zLoch uf hei müesse! Luut üsem Einsame Planet gäbs dert sensationelli Schoggimiuch mit Marshmellows drinne! Dr Ürsu isch dere Läckerei noche wines Ross ame vorgspannte Rüebli! DEnttüschig isch de ou dämäntsprächend gross xi wo drü Marshmellows i Fingernagugrössi ire Miuch-Schoggipulver Soose gschwumme si! Lonely Planet my ass...










In Lake Louis heimer de üses Zäutli wieder Mau ufgschlage u müesse feststöuä, dases dert fasch unger Null isch wirde *biiiibbbbeeeerrrrr* aber mer hei eh lustigi Füürstöu gha wo mer es Füürli gmacht hei, wo sogar dr Tüüfu  ir Höll unger gschwitzt hätt! Dert druf heimer de sogar Teigware mit Pilzsööseli chönne choche!

Baergsee ufem Waeg vo Jasper

Us dr Heimat brichtet is dBusle dases zBiu wh Starbucks gäbi! Guet für üs, guet für dHandles u schlächt für dBärner! Näbstem See, dr Hockeymannschaft u dr BienBar het me iz no eh Grund meh zBiu z'bliibe! Ja Rebi... Das heisst meh uf Biu cho ;-)

Im Übrige het is Busle no drüber informiert dases aso tatsächlech Pizzlies (Polarbär-Grizzly Mischig) gäbi! Aber das sig unnormal, di gäb sech eher ufe Gring im Normalfall! Merci und mir überlegge nis öppis für di Iisatz :-) Im Ueberige vermeldet ou no dr Roeifu, seines Zeichens Fernsehwissenschaftler, dass das stimmt mit de Pizzlies. Es gaebi im Ueberige ou Liger und Wolphins (jede darf iz saelber ueberlegge was das choent si)...

Geschter isch is ou no eh guete passiert. Ufem Zeltplatz heimer ueses Zelt churz a Bode gleit, zums troechne. Das het de sone elaende Anus derzue gnuetzt fuer mit sim Velo quer drueber z fahre. Das obwohl er eh ganzi fucking Strass fuer sich haetti gha. Dr Uersu het sech de entschide ihm es Anus und Idiot nochezrueefe. Das het ihn nid gstoert. Aber wo dAnsch eh Stei i Baseball Manier nach ihm gworfe het, heter sech de doch usem Stoub gmacht...

Guet....  das waers. Bis zum naechsten Mal

Ansch und Uersu

Grizzly

Maligne Lake im Jasper Nationalpark

Mittlerwile simer in Edmonton und chöi ou mit Bäreföteli u Elkgweih ufwarte!!!

Mir si vo Calgary uf Banff wo mer mit Entsetze hei müesse feststöuä, das di Kanadier doch tatsächlech es Alkverbot für ihres verlengerete Wucheänd hei usgäh! Scho dr Bsitz vo Alk isch verbote xi! Mir hei nis natürlech nid lo entmuetige und suuber üses Cachot Bier inegschmugglet ;-)

Elk am graase

In Banff simer ga spaziere und hei dä Prachtsgügger vo Elk xeh!

Schwarzbaer bim Laeckereie verputze

Wiiter simer uf Jasper! Ufem Wäg heimer wieder zOli u dr Adi ufgablet und si no amne Schwarzbär übere Wäg gfahre! Dä het seeleruhig Busch um Busch Beeri gad näb dr Strass vertilgt!











In Jasper het me nis de mitteilt, das uf üse Campground 2 Outo und 1 Zäut, oder 2 Zäut u eis Outo druf möge! Stouz presentiere mer hiä üsi Lösig! 2 Outo und eis Tatzelzelt!

Tatzelzelt

Grizzly im Jasper Nationalpark

Wiiter heimer di Nordamerikanischi Big Five fasch komplettiert! Näb Moose, Elk u Bison heimer ou no eh Grizzlie xeh! Iz fäuht is nume no dr Cougar (Puma)! Aber näbst däm das me diä gloubs würk nid xeht het me is versicheret, das mer diä o nid wöuä xeh! Mit dene Chatzebuslene isch gloubs nid guet Bauchkraulen!







Ds Oli u dr Adi hei is de fründlecherwiis no ihri fetti Matratze überlah u mir hoffe mir si iz grüstet für di rästleche Campingnächt!

In Edmonton simer imne kuule Quartier imne Biergarte xi u hei zwe Kanadier troffe! Vo dene heimer wieder Mau es Rätsu, bsunders für Zoologe! Schiins chöi sech kanadischi Grizzlies u Iisbäre chrütze! Weiss öpper öb das stimmt?

Edmonton het de ou no es riesigs Ichoufszentrum womer natürlech bsuecht hei und chreftig üsi Kreditchartene hei la glühe!

Iz geits wieder id Wildnis und immer Richtig Weste! Das Ende naht...

Ansch u Ürsu

Gelobtes Land

Mir zitiere useme Mail: 'ha scho gmeint dir heiget dä huere Blog dSchissi abeglah... So lang wi dir nüme posted heit'! Mir gelobe Besserig u probiere bis am Schluss dürezhaute!!!

Mir si mittlerwiile i üsem letschte Land a cho! Bekannt as das gelobte Land oder die heilige Kuh (ämu für Lüüt wi dAnsch, Nad u Nicu): CANADA!

As ersts heimer im Writing-on-Stone Provincial Park zäutlet! Hie hei First Nations (oder Indianer im Volksmunde) i Sandstei inegchriblet! Eh Huufe bsoffni Touriste hei das nachegmacht und sich da drin verewiget! Dr Ürsu, alias Häuptling Maulwurf, het knapp ei Indianerzeichnig gfunge! Drfür eh Huufe 'I love u 4 ever' und sörig Gspäss! Guet gmacht!

Wiiter isch hie no Rattlesnake Country, aber mer hei di Hagle wieder nid xeh! Dr Ürsu isch wieder einisch ab jedem Geraschel fasch ufe nächst Boum u woner de no ane Schlangehuut glüffe isch, heter sech volländs is Hösli gmacht! Er betüüret zwar das keh Brämsspur drinne sigi (Gott sei dank si dBoxers schwarz xi)!

Calgary, wes Mau nid raegnet...

In Calgary heimer de dr jüngst Spross vor Marti-Familie atroffe, ds Oli! Inkl. Adi ;-) mir hei i ihrem Heim döfe übernachte, was mir Zäutler agesichts vo Chelti und Rägä sehr gnosse hei! Merci öich zwöine! Si wohne bire Person wo Eigeschafte vor Nina C. us N. het! Für aui diä wo nid wüsse wär das isch, stöuet nech eh Mischig zwüsche Belzebub und Sirene vor! Gwarnt vo ihrere Bosheit het de dr Ürsu dr Scharmbolze uf dArmbrust gspannt und isch artig ga Hallo sägä u dr Obulus ga bringe! 45$ für drü Nächt isch völlig okay, drum heter (ja Chrigu, man höre und staune) 5$ Trinkgäud wöuä gäh! 5$ git sogar im höche Norde es Bier, aber dasch vo de Veganer vehement abglehnt worde! Wie dem auch sei, vor luuter Fröid, het me de üses Bett früsch azoge (sogar dChüssi si mit früsche Fädere gstopft worde) und is sogar Tüechli zur Verfüegig gstöut!

Ueses Deheime bim Oli und Adi

In Calgary heimer de ou no es nätts, euters Ehepaar atroffe wo üs um Hilf mitem Parkometer bätte het! Me heigi doch zahlt, aber es chämi kes Ticket use, usem Outomat! Es het sech de usegstöut, das di rüstigi Grosle 5 1$-Münze i Kreditcharteschlitz gmorgset het! Me heigs ghöre abegheie...

Uesi Houptunterkunft in Amerika

Mir hei öich eigetlech scho lang Mau es Föteli vo üsem Wägeli und üsem Zäut wöuä ufelade, aber s'bis iz geng vergässä... Üses Outo heimer uf Avizon Rojo (der rote Blitz) touft! Mitzlerwiile heimers aber umbenennt uf 'der rote Iltis'! Ds Zält probiere mer stinkfrei z'halte, aber da üsi Schlafseck (nach 8 Monet ou Stinkseck gnannt) geng drin si isches bi Flöige afe sehr beliebt! Mir gelobe aber früsch duscht Deheime ufzchrütze!

Morn goemer mit Oli und Adi uf Banff und Jasper, aso erwartet nued Noeis bis Mitti naechst Wuche!

Oli, Ansch, Adi, Uersu

Der rote Stinker...

Yellowstone

Halli Hallo

Usblick us uesem Zelt uf dr Floeige Insu

Mir wüsse, dir heit wieder einisch müesse warte, aber gloubet üs, ds Warte het sech glohnt (ämu für üs)!

Mir hei mittlerwile fasch aui grosse, nordamerikanische Viecher xeh: Bisons, Moose (aso Elch), Bär und Känus! Jawoll, mir si uf Mama und Papa Känu troffe! Und zwar im Yellowstone Nationalpark.

Aber first things first! Mir si vo üsem letste Blog us Richtig Norde zur Antelope Island wos näbst 1 Mio Vögu und ere Mia Voguschisse no eh gfüehlti Billion Flöige het gha! Dert heimer üsi erste Bisons xeh! Wiiter ischs a Bearlake womer eh Nami mit bedle u Biertrinke verbracht hei!

Bier Trinke am Bear Lake

Moose mit Jungem

In Jackson simer de wieder Mau ines Motel für üsi Vorrät ufdstocke. Ds Highlight dert isch eh Elch mit Bebe xi u das wei mer nech nid vorenthaute! Derzue wett dr Ürsu erwähnt ha, das das Foto mit sire Exkamera gschosse isch worde!!! Wi der nech möget erinnere, het dr Ürsu si Prachtskörper in Patagonie uf sini Kamera gwuchtet! Sithär wird mit agschlagner Cam gfötelet! Iz het sech das erübriget! Eh letschte Fall het se ds Bode bracht! Aber dä Doomshot het si glich no gschafft :-)





När simer i Grand Teton (usgsproche: Tiiton) ga zäutle! Dä Park het si Name vo kanadische Trapper wo äuä scho lang keh Brüscht meh hei xeh u drum gfunge hei di Bärge xächi us wi Tetons, aso Titties... Keh Witz, heimer so im Visitor Center glehrt! Naja! Dert heimer bimne Abefährtli eh Bär am Strasserand xeh Beeri frässä! Leider heimer nid sones guets Foti chönne mache wiu dä Hagu sech im Dickicht versteckt het! Aber: mir hei ne xeh u aui wo das nid löh la zeue chöi üs Mau dr Buggu abrütsch! So!!!

Yellow Stone Geysir

Wiiter ischs i Richtig Yellowstone gange wo me mit de Oldies abgmacht het gha! Am Campingplatz acho het me de festgstöut das diä usgfloge si xi! Wi ja di einte Läser wüsse, fahre sKänus mitem Känu-Mobil ume! Das Fahrzüüg isch nid ds verwächslä mitem Ghost Busters Mobil (ja Nicu, mir vermisse di, aber nume knapp so fest wi Argentinie)!

Am erste Tag im YS heimer X Geysire xeh wo gstunke hei wine ganzi Legebatterie vo verfuulete Eier! Am Abe heimer de sehr zur Fröid vo aune no eh Bisons fasch näbem Outo xeh! Dä het sech aber nid lo us dr Rueh bringe, obwou dr Ürsu ghofft het, das är ines Rudel Amis inesecklet wo fasch uf sis Fressi-Fressi gstange si!

Bueffel wo keni Amis wott agriffe...

Z'Nacht heimer de bewiise, das Känus eh Grillfamilie isch! Und sött das je wieder eine bestritte, söu me doch bitte sone Gluet u sones Fleischli nachemache!














Wiiter wette mir no brichte, das üse Bloggs scho wiit bracht het! Git meh 'love' und 'Americas' uf Google ih, steiter unger de erste 20! Merci für öii Tröii! Derzue müesse mr aber sägä, das ds Interesse offebar abnimmt! Am Afang hei mer meh Bsuecher gha! Aber mir füehre das uf öii Ferie zrügg! Wiu mir si immer no 6 Wuche ungerwägs! Haha!



So, wiiter geits!

Adieu

Susie, Ansch, Peter, Ürsu

Ps. Wölf heimer o no xeh! Aso dSusie, dAnsch u dr Peter! Dr Ürsu daf se nid zöuä, het dr Familierat bestimmt! Er het si Fäudstächer, woner sit 7 Mönet umetreit, vergässä! Das het ne derzue veralasst, eh Fäudstächer vore fründleche Dame uszschloh und ds töipele! Bisme ne de überredt het gha ne aznäh het ds Rudel sini Beute scho fasch verspiise gha...

Pps. Bäre heimer hie im Yellowstone nid xeh! Trotz zahlriiche Warnige simer dene nid begägnet! Mir heinis überleit di Hagle mit Susies Geköch azlocke, aber das heimer de doch la si! Schliesslech isch me ja Fiinschmöcker und  me wott ja nid Perlen an di Bären verfüettere!  Plus: di guet pflegte Handles döfe ja uf ke Fau abgleit wärdä, iz wo dr Winter naht...

Ppps. Ou ruestigi Rentner mueesse ir USA ihri ID zeige wenn si wei es Bier choufe. So geschehen am Herr Kaenu Senior, wo de doch liecht irritiert isch xi, das me ihn uf unger 21 schetzt... Haha

Ppps.

Nachtragblogg mit Fotos

Ahoi
Da mir wüsse das üses Zielpublikum eher visuell veralagt isch und nid würklech erfröit isch über read-only Bloggs, chunt hie no dr Nachtrag vom letste Blogg inkl Fotos!

As ersts hei mer dRedwoods wo sehr schön und ungloublech gross si! 

När wiiter mitem Yosemite Narionalpark.







Zum Schluss no 2 Fotos vom Bryce Canyon und vom Zion Nationalpark!


Zion Nationalpark Spaziergang



Natural Bridge im Bryce Canyon

Ruby am Freese

Des weiteren heimer no eh nöii Reisebegleiterin! Mir hei eh vom usstärbe bedrohti Art unterstützt u si iz Öutere vor Ruby, üsere Präriehündin! Zämä mitem Tucan triibt si iz ihres Unwäsä i üsem Outo!

So, mir gö iz go Bison sueche, a Bear Lake und när i zwe Etappe zum Yellowstone womer Känu Seniors träffä u hoffe das mer Grizzlies etc xeh...

Tucan im Bryce Canyon

Bis zum nächste Mau

Ansch und Ürsu

Camper

Wi akündet si mer unger dCamper und hei iz scho vier Nächt im Zäut ufem Buggu! Entsprächend gits ou scho einiges z'brichte :-)

Di ersti Nacht heimer ohni Mätteli und Dechine im Big Basin Redwood State Park verbracht! Liecht ungmüetlech und chaut xi! Drfür heimer dert scho eh Gast gha! Eh Racoon (Woschbäa) het sech a Ürsus Necessaire z'schaffe gmacht und mit sine Pfote drin umegwüehlet! Entgägä sim Name heter die aber nid gwäschä gha und eh Ladig Härd i Ürsus Waschsalon gschuflet!

Vo dene Strapaze heimer is ds Sacramento imne Hostel erholt, womer is ou no mit Fressi-Fressi, Mätteli, Dechine, Gas Chocher etc ideckt hei! Vou usgrüstet simer de a Lake Tahoe gfreeset womer Ansch's Geburtstag gfiiret hei! Duschine hets öppe nie uf dene huere Zäutplätz, drum simer i jede Bärgsee ghüpft! 

Vom Lake Tahoe simer i Yosemite Nationalpark! Dert heimer zZäut es dritts Mau ufgstöut! In Argentinie heimer ja usegfunge, das mer üsi Schlafseck cha zämäriisverschlüssle! D'Ansch bhouptet aber, dr Ürsu mach bim Pfuuse dr Tazmanisch Tüüfu und löngi z'viu chalti Luft ine! Drum macht si iz dr Perro Caliente (Hot Dog) und geit elei i Schlafsack und dräiht sech no i ihri Dechi ih, während dr arm Ürsu näbädra frührt wine alte Schlosshund ;-)

So... Was heimer süsch no xeh? Eh huufe Reh mit pünktlete Bambis, eh Hörsch, es fetts Murmutier und öppe 100 frächi Chipmunks (wo me mit Chriesi u Chips cha füetter)! Das mit de Bäre isch geng so chli zwiispäutig! Einersiits wet me sone Hagu xeh, angerersiits sötter de doch nid ds Nöch cho! Wos de im Yosemite im Beeribusch luut graschlet het, ischer uf u drfoh! Z'Glliche machter bi de Eidechsli... Jedesmau we eis drfoh huscht xehter eh Rassuschlange und hüpft fasch ufe nächst Boum ;-)

Güet! Das wärs vo üs!

Cheers 

Ansch u Ürsu

Ps. Vor luuter campe isch öppis no fasch vrgässä gange... Ds San Francisco heimer mit Säru u Fäb no eh amüsanti Busfahrt gha! I erst best Bus igstige und festgstöut, das dFahrerin mit Händschli und Hüetli isch usgstattet xi! Nach zwe Stopps het si aber de scho müesse frage: 'which stop is this?'! Ihri Fähigkeite si wiiter testet worde wi bi de nächste 5 Stopps, drei Rollstuehlfahrer hei wöuä zuestiige! Mit zum Zerrisse gspannte Närvä het si de es Trottoir überfahre, dr Bus fasch zum kippe brocht und üs somit zum Usstige veralasst!

San Francisco

If you're going to San Francisco...

Vorem zNacht mit Kaenu-Oldies

Am Sundi hei üs Sara und Chrigel verloh... Vor luuter Truur über ihri Rückreis het is el Taxiste am Schluss no fasch i Tod gfahre! Er isch fautsch abboge und mir si plötzlech fasch vom Gägäverchehr überrollt worde ;-) ds lustige dra isch, das dr Fäbu zwe Stung speeter ir gliiche Richtig i di gliichi Strass iboge isch! Good job guys...

Mit Säru u Fäbu simer de am erste Tag ga dStadt aluege! Das het drmit g'ändet das mer nach 30min ine Bar si und dä Stadtrundgang ine Bartour umgwandlet :-)

Killer Bunny im Mission District

 Am nächste Tag heimer is de bimne Süppli am Pier erholt und no Ürsus Öutere xeh... Di hei sogar gfunge mir xächi guet us (was üsne Chopfschmärzä ah sicher gloge isch xi - hehe)! Mir hei de mit ne abgmacht für ga ds Ässä!

Am nächste Tag simer mitem rote Flitzer mit 85 statt 65mph vor Polizei ertappt worde! Aui angere si zwar glich schnäu gfahre, aber  üs het me usegno! Das ja nid offesichtlech isch wi zwöi wiiblechi u zwöi männlechi Touriste imne gmietete Outo chönte zämä ghöre hei mer de no X Frage i dere Richtig döfe beantworte... Ds Ganze het offebar as Iischüchterig dient... Me het is när mitemne 'You must obey the law' ohni Buess entloh! Dr Pulver heimer de für Chleider u Börger igsetzt!






 Am Abe simer de mit de Oldies bimne Italo go ässä! Sensationell läcker u lustig xi! Ds Äxtra-Trinkgäud füre Chäuner het me zämägröuelet und ihm zuegsteckt... Was är grinsend mitemne 'Thank you, but I don't do Cocaine' quittiert het!

Vor dr Golden Gate Bridge (links hinger)

Am nächste Morge simer imne One Dollar Shop xi und dr Ürsu het chle Wind gha (är meint es sig me es Fürzli xi)... Dä Donnerschlag isch vomne Mandli mit: 'Oh my god! No, oh my goodness! An Earthquake!!!' beschribe worde!

Jo, das wärs iz de scho xi mit üsem drü wüchige Bsuech! Schnäu ischs verbii xi :-(

Und no bim xunde Aesse :-)

Iz zieh mer de ab morn mit üsem eigete Wägeli wiiter!

Auf bald

Säru, Ansch, Fäb & Ürsu

Vo Las Vegas, Töipele u Hitzeperiode...

Ufem Waeg i Pizza Hut

Nach LA u San Diego heimer üs i Joshua Tree Nationalpark gwagt! 500'000 Grad hei is bi lebändigem Liib la schmelze und mir hei däm mit Poolbsueche, 2 Pint Ben & Jerry's Glace und eme Monstercascho Dos X (für nid Mexicaner z'zwöit beschte Bier us Mexico) entgägä gwirkt! Mer heis chuum gloubt, aber es het eh Mount Ryan i däm Park gha (eh Bewiis das z'viu Sunne eidütig am Hirni schadet - wär git eme Bärg scho so ne Name)! DSara heimer knapp dervo chönne bewahre ne z'bestige ;-) mir heis de bime Foti la bewände!

Stachelkaktus im Joshua Tree NP

Im Park hets o no ganz geili Kaktüss (Ah nei, Kaktee) gha wo bir Berüehrig ihri Stachle gschosse hättä! Us nachevouziehbare Gründ heimer das nid teschtet!









Vom Nationalpark simer uf Las Vegas gfreeset! Dr Sündepfuhl vor USA het de eher spielsüchtig veralagte Churzziitreisende besser gfalle! Unmängine Gäud si igsetzt worde! Wohingägä di Langziitreisende eher moderat gspiut hei... Dr Ürsu het bim eiarmige Bandit für Pennies gspiut und isch fasch düredräiht daser komischerwiis keh Million usezoge het! D'Ansch het dSpändierhose agleit und 4x 10$ (Mindestisatz versteit sech) bim Roulette igsetzt! Entgägäm Äschlimaa sim Rat moderat und verteilt z'investiere het si jeweils eh 10er uf ei Farb gsetzt! Nach 4 Rundinne isch dr Gspass fertig xi!

Mit Skull-Mug in Las Vegas

Zum Grücht me chönn Gratis suufe weme spiut chöimer fougendes sägä: dAnsch u dSärlä hei am Roulette Tisch eh Margharita chönne bstöuä! Da me ja wott das dSpieler möglechst lang am Tisch bliibe, geits aber ca 3/4h bis dr Drink atrabet chunt! Üsi guet betuechte Dame hei bis denn scho aus verlore gha und ds Wiite gsuecht! Dr Chrigu het derweil am Black Jack Tisch knapp 3h usgharret! Und: es Wasser trunke! DAspannig isch so gross xi, daser sech när gad ufem Kasinolokus het müesse ga entläärä! 2h später heter de dr Däumling gmacht u isch ga pfuuse! Bi de Juriste füehrt konzentrierts Arbeite über meh as 2h offebar zu Erschöpfigsähnleche Zueständ! Zu CLs Verteidigung (und ou dene vo de Juriste) muess me sägä, das di grossi Konzentration offebar Frücht treit! Ds Mandli het si 200$ Iisatz vereinehalbfacht - müesst dr Rächner fürenäh für di aspruchsvolli Rächnig... Im Übrige müesse aui Heuschrecke deheim gar nid wöuä ga bättlä, ds Gäld isch scho investiert und zwar i üsi Büüch. Mir si zum zNacht iglade worde!!! Schad isch nume, das dr Dollarkurs so töif isch, süsch wäret dr vilech o no zum Zug cho! Er het aber mit sim Iisatz es paar Sache bewiise, resp widerleit: wer wagt gewinnt und das Kasino gewinnt NICHT immer! Meh as aus angere beruhigt üs aber, das di juristische Konzentration offebar förderlech isch! Mer müesse aso nid um üses Rächtssystem fürchte...

Derweil isch der Wütherich mit sire Chatz no es Musical ga luege: Lion King! Trotz viel Tanz u Chatzegjammer heter müesse zuegäh das das Ganze keh Seich isch xi... ;-)

Nach Vegas simer wiiter uf Santa Clarita womer im Chino si xi: Captain America! Eh Rieseschwachsinn wo nume mit 2l Cola und eme Riesechübu Popcorn z'bewältige isch xi!

Jawoll, so schlimm si di Bahne dert xi...

När simer i Six Flags Magic Mountain Vergnüegigspark. Aus Gjammer het em Ürsu nüd gnützt! Er isch mitgschleipft worde! Das wieder einisch nid nach sim Chopf isch gange heter de töipelet u bi jedere Bahn Zeeter Mordio gschroue! Dr Achso tapfer Chrigu het nume di schlimmste Bahne wöuä mache! Nach zwe heter scho Chäppidruck gha und dSara auf Knien um nes Ponstan agfleht! Am Abe hets de no eh Lobster gäh und me isch früeh is Bett... Dert isch dr Chrigu wiitergfahre und het sech im Bett gwälzt wi wener geng no ufeme Rollercoaster wär xi! Das het sech bis is Outo am nächste Morge wiiterzoge! Nach 15min het dSara müesse fürehocke! Di ruppigi Fahrtwiis vom Herr Lienhard (äuä no vom Vortag) het ihre ohnehin (äuä vom Vortag) gschädigt Körper zum rebelliere brocht! Di letschti Bahn het üsne Schädle übrigens dr Räscht gäh und mer zGländ fluchtartig verlah!

Ben & Jerrys Girl

Iz simer de gad in Sta Cruz, üsem vorletste Stopp!
Bis bald

Sara, Ansch, Chrigu, Ürsu