Von Iltissen, bibbernden Campern und Breili

Guete Abe

Di letschte drei Taeg hei mer ues chli verusgabt und probiert z'teste wi Waetter- und Wanderfescht das mer si... ums vorwaeg z'naeh: mir si Gnussmoensche (was me a uesne Koerperboute xeht) :-)

Mir si i Torres del Paine Nationaupark go wandere. Dert chame es sogenannts "W" wandere, wome de aus schoene xeh het, resp. haet... Mir hei ues, fuul wi mir vo Natur us si, scho Mau vo Afang ah fuer ne chuerzeri Strecki entschiede.

Dr Huegu dueruf und naer um dae See ume...

Torres del Paine

Bepackt miteme fette Rucksack voll vo Zaeut, Maetteli, GasChocher etc. und eme Fraesspack, si mer de gstartet und hei uesi Koerper id Hoechi ufe ghiefet... Nach 15min si dRuegge scho pachnass xi und me het mueesse abziaeh, eh ersti Pouse mueesse mache und oeppis i Rache waerfe. Stetig ufwaerts ischs gange bis is erste Camping uf ca 800m. Dert heimer ufgschlage und si z'erschte (und einzige Highlight go luege) - di drei Tuerm. i uesem Verstandnis isch der letscht Teil vo daem Waeg zwar eher Baergstige xi as Wandere, aber mir si ja ou kei Massstab... (Nad: remember Mount Marathon)



Naer simer zruegg zum Zelt und hei dert kochet und ues igmummelet i uesne Super Schlafseck... Nach ca. 10m heimer afoh schlottere und eh Flaesche vou heissem Wasser as Buettu bruucht. Gnuetzt hets nued und mir hei ues naer wine Pellwurscht probiere z'zwoeit i ei Schlafsack z'presse. Das het natuerlech nume bedingt guet klappt und uesi Koerpertemparatur isch uf gefuehlte 10 Grad unger Null gsunke (Lovehandles Hin oder Haer). Dusche het me natuerlech nid choenne und ds WC isch so wueescht xi, das me ded ou nid wuerklech sis Fuedeli het woeuae druf setze...
 

Haferbrei - i has nid guet gfunge, si het mi zwunge z'lache :-)

Wiiter ischs miteme sehr laeckere zMorge gange... Haferbrei (aso... eh Buettu und heisses Wasser dri... that's it)... dAnsch fingt das eh Laeckerei, angeri Mitreisendi eher weniger...

Mir hei gfunge me choenni nid ufgaeh und hei naer eh raechte Rieme aghaenkt fuer das mer de frueeh uf ne Faehri fuer zruegg haette choenne... Leider hei ues dChraeft verloh und mir hei no einisch mueesse campiere... Mittlerwiile het sech 2 taegige Schweissgruch agsammlet und i uesne Schlafsaeck (womer, oh Wunder hei choenne zaemesetze) hets gstunke wi ihre Iltis-Hoehli... wueeeescht! zNacht heimer ueberigens eh feini Buettutomatesuppe gmacht! Sehr laecker (im Gaegesatz zum Dueftli im Schlafsack)!

Mit Teigware (nid usem Buettu sondern vorkocht) - ueses 1te zNacht

Am dritte Tag hets naer no wueescht woeuae und mir hei no eh 3h Marsch mit aschliessendem 2h Warte und 3h Heifahrt bachnass doerfe verbringe.

Fazit: Mir si kener Wanderer und waerde in Zuekunft nume no Sache mache wome am Abe cha es Duescheli naeh, es Pack Chips ufdue und es Bierli zwicke! Aus angere cha nued si! Mindestussetemperatur 15-20 Grad!

Adieu